सभनें किट्ठे मिलियै असें नौजवान समझाना
मुल्खै अंदर जड़ करेड़ी नशा हुन मकाना
नशा भाएं कोई बी होऐ साढ़ा म्हेशा बैरी
बल्लें-बल्लें रंगें दे अंदर भरदा बेस ऐ जैह्री
एह्दे शकंजै फसै जेह्ड़ा गभरू समझाना
मुल्खै अंदर जड़ करेड़ी, नशा हून मकाना ।
पीने कन्नै टब्बर सारा करदा एह् परेशान
दुद्ध ते मक्खन भुल्ली गे न फ्रूटी डाफी जान
फ्ही की आखचै कलेजा खाई गे भूत-प्रेत ते डैन
दवाई बी रज्जी खन्ने अस असर निं करे जवैन
बेहोशी च रʼवै जेह्ड़ा होशा उसी ल्यौना
मुल्खै अंदर जड़ करेड़ी, नशा हून मकाना ।
मूंह् नी पाचै भुल्लियै बी जालिम हुंदी चुटकी
घर बी बेची बट्टी दिंदा एह् करांदा कुड़की
नाके असें लोआने सारै गिज्झै नेईं कोई लाल
हत्थें इंʼदे हुन फड़काने बैट ते कन्नै बाल
नशे दा लंबड़दार ऐ जेह्ड़ा फाटक उसी डकाना
मुल्खै अंदर जड़ करेड़ी, नशा हुन मकाना ।
नौजवान कुड़ियां बच्चे, हरकत एह् घनौनी
हुस्न-जवानी लैओ बचाई, परती नेईं एह् थ्होनी
तुंʼदै हत्थें इज़्जत सारी इसी लैओ बचाई
नशा हमेशा पिच्छें लग्गी करदा नास-तबाही
एह्दी रौनक किश धेआड़े, लगदा फ्ही कलमाना
मुल्खै अंदर जड़ करेड़ी, नशा हुन मकाना ।
हफीम ते गांजा चिट्टा कन्नै एह् न कैंसर टी-बी
सक्के इंʼदे भैन-भ्राऽ न सिगरेट कन्नै बीड़ी
हुक्का इंʼदा फुप्फड़ लगदा बुआ इंʼदी झारी
नासें धूं ते बुड़-बुड़ करदी लांदी साह्-बमारी
नौजवान घेरै फसै चड़ेलें कशा बचाना
मुल्खै अंदर जड़ करेड़ी, नशा हुन मकाना।
पऊआ आखै अ'ऊं आं ब्हादुर निग्गर घुड़की मारां
ठेकें बाह्र मेरे पिच्छै लग्गियां मुल्ख कतारां
देसी गैलन अपने कन्नै नौजवान फसांदी
अंग्रेजी बोतल होली बरेसा हड्डी चुक्की नचांदी
गुत्थी भंग नेओला मार्केट फुक्की अग्ग जलाना
मुल्खै अंदर जड़ करेड़ी, नशा हुन मकाना।
नशा म्हेशा जिंदू अंदर किडनी गी जाइयै रुक्कै
एह्दे कन्नै छाती पीड़ां, फेफड़ा अंदर सुक्कै
पित्ता बक्ख फड़कै, कन्नै जागन गुर्दे पीड़ां
किन्ने बारी गुर्दे-किडनी-पित्ता असें कढान
मुल्खै अंदर जड़ करेड़ी, नशा हुन मकाना ।
माऊ-बब्बै दा फर्ज़ बनदा ञ्याने रस्तै लाने
रक्खी तक्क इंʼदे उप्पर नशें कोला बचाने
किट्ठे मिलियै जाई सुनाचै बंद होए बपार
गभरू जवान नशे डुब्बे रोकै एह् सरकार
नगरे शैह्रें नशें विरोधी मिलियै जलूस कढाना
मुल्खै अंदर जड़ करेड़ी, नशा हुन मकाना ।
चूह्का छप्पी नौजवाना सूआ निग्गर लान्नां
अपने ऐब अंदर रक्खी तूं भाई की छपालनां
अजें बी मौका समझी जाऽ तूं ऐब लै छड़काई
जालिम दुश्मन एह् ऐ साढ़ा इसी दूर नसाना
मुल्खै अंदर जड़ करेड़ी, नशा हुन मकाना ।
नशा छोड़ी मुंगफली ते गच्चक हून मंगाओ
कन्नै एह्दे काजू, बदाम, गुड़ैं दी रोड़ी खाओ
छुवारा आखै मिकी बी कन्नै देओ मड़ेओ थाह्र
बारां मासी किन्नू बी खाचै केलै लमकन धराड़
रूक्ख ककड़ी शुगर फ्री ऐ मता रज्ज लाना
मुल्खै अंदर जड़ करेड़ी नशा हून मकाना।
नशा खतम कराना ‘कुंडड़िया’ तेरी बी जिम्मेदारी
मुंढा दा एह्दी जढ़ घरेड़ी पुट्टी सुʼट्ट बमारी
सब्भै मिलियै आला मारी इस्सी बंद करवाचै
नौजवान पीढ़ी गी अस एह्दे कोला बचाचै
समाज दे अंदर हर माह्नू गी असें एह् सुनाना
मुल्खै अंदर जड़ करेड़ी, नशा हुन मकाना
----------------
