तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
तूं गै मां शिवा-राणा दी, तूं गै भगत सिंह जाया
तूं गै राम-कृष्ण बेटें गी गोदी बिच्च खढाया
तेरा सीर गै हनुमान, सागर गी देऐ ललकार
तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
तूं गै कुंती-गार्गी-सीता, तूं गै लच्छमी बाई
तूं गै दुर्गा-चावला-मीरा, तूं गै भिल्लनी माई
आशा-उषा-लता मंगेश्कर, सुर-संगम संसार
तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
मां दे रूप बिच्च वंश बधाऐं, तन-मन-ममता बारैं
भैन बनी घर खुशियां बंडनीं, बेटी घर गी सुआरैं
घर-चौखट बिच्च रूप ऐ देवी सुख-शांति दी ब्हार
तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
तूं नारी सौ टुकड़े होई सब दा दर्द नवारैं
मां-भैन-पत्नी-धी बनियै जग दा रूप सुआरैं
पार्वती-सरस्वती-लच्छमी, तेरे रूप हजार
तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
संकट बिच्च अज्ज देश मेरा, चंडी बनी उभारो
भटकै करदा युवा देश दा, इसदी बत्त सुआरो
जन-जन बिच्च भाईचारा लब्भै, बधै एह् हिरख-प्यार
तूं अबला नेईं, सबला नारी-शक्ति दा अवतार
फ्ही बी की तूं सैह्न करैं नित्त शोशन-अत्याचार ?
