हे ईश्वर, तुस कल्याण करो
मिगी सद्बुद्धि दा दान करो ।
मेरे बस्स मेरी बुद्ध होऐ
हिरदे बी मेरा शुद्ध होऐ
निं मन मेरा आसक्त होऐ
विशें च नेईं अनुरक्त होऐ
मन में समझाई-मनाई लैं
मोह् कोला दूर नसाई लैं
मेरे उप्पर इन्ना स्हान करो
मिगी सद्बुद्धि दा दान करो ।
मन मेरे मताबक मुड़दा जाऽ
चांह् जिद्धर उद्धर जुड़दा जाऽ
मन मेरा किश कमजोर पवै
बुद्धि दा उस पर जोर होऐ
फ्ही विशे-वासना ढाई सकां
मन अपने स्हाबें लाई सकां
तुस जीन मेरा आसान करो
मिगी सद्बुद्धि दा दान करो ।
मन चंचलता गी भुल्ली जाऽ
रंग विशें दा सारा उ'ल्ली जाऽ
चांह् जिसलै आई खड़ोई जाऽ
बुद्धि दे मताबक होई जाऽ
नेही आदत उसगी पेई जाऽ
में सोचां झट ओह् बेही जाऽ
इ'यै नेहा किश भगवान करो
मिगी सद्बुद्धि दा दान करो ।
बुद्धि फ्ही कुशाग्र होऐ नेही
छ्होंदे गै मन जाऽ झट बेही
बुद्धि दी लगाम उसी चुब्भी जाऽ
कंडें साहीं उसगी खुब्भी जाऽ
उस कन्नै नेहा थम्होई जाऽ
खिचदे गै सार खड़ोई जाऽ
मेरे पास्सै तुस ध्यान करो
मिगी सद्बुद्धि दा दान करो ।
बुद्धि तुस शत-प्रतिशत करो
जां भलेआं इसगी घट्ट करो
एह् मोह् नै मती निं जुड़ी सकै
जां जुड़ी दी वापस मुड़ी सकै
मेरी मुहार दनां मोड़ो हां
रस्सी तुस मोह् दी त्रोड़ो हां
मिगी ऐसा वर प्रदान करो
मिगी सद्बुद्धि दा दान करो ।
मस्ती बिच नेईं मद-मस्त र'वै
सदा बुद्धि अग्गै अस्त होऐ
मन कदें निं बेलगाम होऐ
बुद्धि दा सदा एह् गुलाम र'वै
बुद्धि दा घेरा इस्सी पेई जाऽ
खुदियां करने शा रेही जाऽ
पूरा मेरा अरमान करो
मिगी सद्बुद्धि दा दान करो ।
