किन्नी गै धूड़ मिट्टी, उं’दे पिंडे पर होई ही किट्ठी
लिंबां बी होइयां मैलियां, ते मैल बी ही पिट्ठी
इ’यां गै लब्भा’रदे हे ज’ल्लू-ब’ल्लू
तां उं’दी माऊ ने खोह्ल्ले हे उं’दे टल्लू
जे ओह् करग उ’नेंगी मालश, लेइयै घ्योऽ खालस
तां जे ओह् तगड़े होङन ते कुसै कम्मै-काज्जै लेई अगड़े होङन
शैल भलोआन बनङन ते भलेआ छोड़ी देङन आलस
फ्ही ओह् उ’नेंगी शैल चाल्ली बडेरग ते सोह्ग्गे करियै खडेरग
ओह् घ्यो लैने गी गेई ही पसारिया
तां पतझड़ बनियै सरीकनी बैठी दी ही दोआरिया
ओह् छुत कीते दे बेह्ड़ै आई गेई ही
स’ञ घरोई गेई ही, मां तुप्पी-तुप्पी फामी होई गेई ही
घाल होई गे हे कुसै माऊ दे जज्बात
दुक्खें दा चलेआ हा ऐसा खड़बात
माऊ दी ममता रोई पेई ही
चबक्खै पतझड़ होई गेई ही
बूह्टे होई गे हे भलेआं रोड्डू
कुसै दियां बाह्मां ठरा’दियां हियां, कुसै दे गोड्डू
अत्थरूं बनी गे ओस हे, सब भागें दे गै दोश हे
कोरे ते पाले नै होई गे हे भलेआं सुन्न
सरीकनी सु’ट्टी गेई ही किश ऐसे घसमुन्न
ओह् अत्थड़ गै रोआ दे हे, मड़े भागें गी कोहा दे हे
मड़े सुक्कियै तील्ले होई गे हे, उं’दे ओठू नील्ले होई गे हे
सारे दे सारे गै खज्जल खोआरी दे कबील्ले होई गे हे
ओह् रुंड-मरुंडे होई गे हे, सक्खने ते गूंढे होई गे हे
किश लुंडे, किश टुंडे होई गे हे, हाथी अश्कै बेसुंडे होई गे हे
ठरी गे, मरी गे, साढ़े प तरस खाओ
प्रभु जी, तौले आओ, साढ़ी लाज हून बचाओ
ओह् करा दे फरेआद हे, ‘उसगी’ करा दे याद हे
‘उसदा’ सिंहासन डोल्लेआ, बूह्टे गी कुसने रोलेआ
उं’दा बी माड़ा हाल हाँ, पत्तरें दा पेआ काल हा
इ’यां जे रौह्ङन सक्खने, तां फल कु’त्थां दा चक्खने
बूह्टे दी फरेआद खीर प्रभु कश पुज्जी ही
उं’दी रक्खेआ करने दी उसगी सबील सुज्झी ही
इंदर ने बरखा बरहाई, उ’नेंगी शैल चाल्ली नोहालेआ हा
फ्ही कीती ही उं’दी सांत ते लाड्डै कन्नै कोआलेआ हा
उ’नेंगी प्रभु ने गैह्ने-बंद्धे दित्ते हे
परमारथ लेई, कम्म धंदे दित्ते हे
कुसै गी थ्होए हार ते कुसै गी थ्होए झुमके हे
मस्ती नै कड्ढी टौह्र, बूह्टे दे अंग-संग
चिल्ले पक्के, मंडे पक्के घ्योए इच चुर्र
कालियां चिड़ियां गीत गाई, होन लगियां फुर्र
आह्लड़ू बना दियां, जिंद एह् न ला दियां
मिट्ठे गीत गाई-गाई, रौनकां न ला दियां
कांऽ, इल्लां उड्डरन जि’यां अंबरै पर ज्हाज न
बक्खरे गै सुर न ते बक्खरे गै साज न
अंबरै पर जाई जि’यां करा दे रियाज न
फुल्लें दी रंगोली ऐ, किरणें सनैह्री डोह्ल्ली ऐ
गास्सै ने मैल गोली ऐ, रुत्त आई गेई भोली ऐ
चपासमै गै दिक्खो मड़ो, हिरखी बोल्ली बोल्ली ऐ
पक्खरू बजांदे कैह्ल न, एह् राग किन्ने शैल न
कोयल प्यौके आई ऐ, बधाई ऐ-बधाई ऐ
नक्कै च मुरकी पाई ऐ, होठें प सुरखी लाई ऐ
कलियें दे डेह्ल्लू खु’ल्ले न, स’रेआं नै खेतर फुल्ले न
अंबें गी पेआ खौर ऐ, एह् बस्सोआं दा दौर ऐ
सरीकनी भलखोई गेई, धारें शा ओह्ल्लै होई गेई
तितली बी पाइयै कीकली, चार धाम लेई निकली
भौरें बी गीत गीत गा ‘रदे, फुल्लें गी न पतेआऽ ‘रदे
नस्सी गेई नमोशी ऐ, बूह्टे दी ताजपोशी ऐ
अंबरै पर बिछे जि’यां फुल्ल चिट्टे बछान न
अश्कै लट्ठे दे थान न, औने जि’यां मैह्मान न
तारें दी दीपमाला ऐ, चन्नै दा रूप आला ऐ
दूर धारें घलन लगा, चिट्टा-चिट्टा पाला ऐ
सुत्ते दा हर जीव जैंतर, दिक्खो हून बिज्झेआ
नवेद लोआने लेई कुतै, भत्त पीला रिज्झेआ
चबक्खै होई लोऽ ऐ, हवनै दी खश्बो ऐ
फुल्लें नै झलटां फुल्लियां, सगातां थ्होइयां खु’ल्लियां
पक्खरुएं दे चैह्कने दा, फुल्लें दे मैह्कने दा
फ्ही चली पेआ रवाज ऐ, फर-फर करदी ब्हाऊ दा मिट्ठा-मिट्ठा साज ऐ
रंग-बरंगे फुल्लें दा, हर बूह्टे पर ताज ऐ
बूह्टे दी बेकारी मुक्की, थ्होआ कम्म-काज ऐ
एह् बसंत दा आगाज़ ऐ, एह् बसंत दा आगाज़ ऐ ।.
