पल दो पल

तेरे अंग मलैम डाह्‌लियें गी
भरदे न अपने कूले कलावें च 
कलियें साहीं 
लैह्-लैह्, लैह-लैह् 
लैह्‌कदा तेरा मस्त जौबन
ते
जदूं तेरी बाह्‌में दे हार
करदे न मेरा शंगार
तां
तेरा जादू स्पर्श 
पल, दो पल गै सेही
छेडी़ जंदा ऐ
मेरे देह्-सरोवरै दा जलतरंग ।

फ्ही मिलने दी तल्लो-मच्छी च 
तेरे चेतें दी लाट 
मेरी कलबेली सोचैं
इ'यां पाई जंदी ऐ झमकारा 
जि’यां गुप्प न्हेरे च
बदलोखड़े गासै 
बिज्ज खडेरी जंदी ऐ 
झलमल-झलमल परभाती झालर  
पल दो पल 
बस्स, पल दो पल।