जिसलै कोई जनानी
माँ बनने लेई
गर्भ धारण करदी ऐ....!
उस बेल्लै इक मर्द
दा गर्भ धारण होंदा
उसदे दमाका च
माँ बनने लेई
नौ म्हीनें दी
कठिन तपस्या
करदी जनानी।
इक-इक मिंट लैंदी
सुखे-दुखे दे साह्
कदें बुहास्सरदी
कदें चुप-चपिते
कम्में च रूज्झी रौंह्दी।
पर
प्यो बनने
आह्ले मर्द दे
गर्भ दा ज्ञान
कुसै गी नेई
कुसै’ई होंदा ओह् ज्ञान
अपने भावी पिता बनने
दी खुशी गी छपेलदा
ओह् रुज्झे दा रौंह्दा
औने आह्ले जीऽ दे
सुखी स्वस्थ जीवन दे
सरिस्ते करने गी।
जनानी दी नौ म्हीनें दी
तपस्या
उसी सभनें दी अक्खीं
दा तारा करी दिंदी
पर मर्दे दी तपस्या
कुसै दी नजरी च औंदी गै नेईं
माँ अपनी कुक्खै च
अपना खून
पलाइयै बच्चे गी पालदी
पर एह् कुन्न सोचदा जे ओह् खून
उस पिता दे परसीने दे
तोपें चा नुचडे़या ऐ।
माँ दी तपस्या नौ महीने ऐ
जेह्ड़ी उसी एक
देवी दा दर्जा दोआंदी ऐ
पर प्यो दी तपस्या
अनगिनत पलें
दिनें, हफ़्तें, म्हीनें,
ते सालें दी ऐ
ते उं'दे बट्टे प्यो गी
कोई नांऽ बी नेईं थ्होंदा
उ'दा ते फर्ज गै गनोंदा
माँ बच्चे गी दूद्ध पलैंदी
पर ओह् दूद्ध
प्यो दी मेह्नत दी परसीने
दे तोपें न
एह् कुन्न सोचदा।
माँ चलना सखांदी ऐ
पर प्यो पैरें पर
खलोने लेई
सिद्धे-पद्दरे रस्ते बनांदा
चलना ते सभनें गी लभदा
पर रस्ता कोई नेईं दिखदा
सारें गी दौड़ गै लभदी ऐ
मां दे लफ्फड़ें च बी हिरख ऐ
पर प्यौ दियें दरड्डे च छप्पन
चिंता कुसै गी नेई लभदी।
लभदा प्यो दा साकरा होना।
माँ दी तपस्या नौ महीने दी ही
जीऽ बाह्र आइयै जीवन जिं'दा
पर प्यो दे गर्भ धारण
दा समांऽ उसदे दमाका च
समें कन्नै-कन्नै बदधा गै जं'दा
बदधा गै जं'दा
एह् कुसै ने सोचेआ।
प्यो दे अन्दर भी इक माँ ऐ
जिसदी कुक्ख कुसै गी नेईं लभदी
जिसदी गर्भ धारणा लम्मी ऐ
बड़ी गै लम्मी
प्यो बी एक माँ गै ऐ
जि'दी ममता कुसै गी नेईं लभदी
इस माँ बारै कुसै नेईं सोचेआ
कदें नेईं सोचेआ
कीऽ नेईं सोचेआ।
——————————-
