बड़ी खुश होई होनी मां
दिक्खियै जदूं भरी
होग में पैह्ली घसूतड़ी
गुड़ बी बंडेआ होना
नजर तुआरने आस्तै
निक्की हारी घुंगरी
परोइयै काली करूतनी
च बी पाई होनी
बाह्में दे जोर ढिड्डै भार
अग्गें बधने लेई
बल्लें-बल्लें बौह्न, खड़ोन
ते फ्ही टुरन लगा होगा में
टुरना ते फ्ही डिग्गी पौना
रोना, द्रौड़ियै ठुआलना
मां ने थापी देई फ्ही टुरने
लेई हौंसला भरना
ते फ्ही टुरने लेई आखना ।
पर हून मां नेईं रेही
टुरी गेदी ऐ अपनी
दुनिया च
कुसी दस्सां जे हून में
थोह्ड़ा-थोह्ड़ा टुरनां
सिक्खी लेदा ऐ ।
मां दे शीरवाद कन्नै
कदें-कदें द्रौड़ने दी
बी कोश्ट करनां
पर हर कोई मिगी दिक्खियै
खुश नेईं होंदा
जि'यां मां खुश होंदी ही ।
सगुआं डगाने च लग्गे
दा ऐ मिगी हर कोई
एह् ते मां दा गै शीरवाद ऐ
जे में फ्ही बी टुरी जा' रनां
केईं पड़ांऽ
पार करी लैते न में
अग्गें बधने दी चाह्
मनै च पाली
की जे मां ने मिगी
थापी देइयै टुरने लेई
आखेआ हा
टुरी जा' रनां में अजें बी
नमें-नमें थाह्र
स्थापत करने आस्तै ।
