में तुप्पै करनां आं
उस कुड़ी गी
जेह्ड़ी बैठी दी ऐ
बदलुएं दी डोली च
ते जिसनै
पाई दी ऐ पशाकी बसैंती
ते कज्जे दा ऐ सिर
तारें दी मकैशै आह्ले, ओढनू कन्नै।
किनमिन किनमिन कनियें दे
सुच्चे मोतिएं दी गल माला ऐ
ते अक्खीं च दि'ब्ब जोती दी जुआला ऐ
गलाबी ग'ल्लें पर गुत्तियां न
मोसमीं रंगें कन्नै
भरची दि'यां मुट्ठियां न।
हूनै हूनै ओह्
डोली परा छड़ापी मारियै
बेई गेई ऐ
अम्बरै दे डाह्लें पर पेई दी पींह्गै पर
निक्के होंदे में जिसगी अक्सर आखदा हा
गुड्डी-गुड्डे दी पींह्ग।
आखदे न जे
सत-शमानै दे सत्तें-पर्दें च
दि'ब्ब नजारें दा तिलस्सम
बंद ऐ इक संदूकड़ी च
ते ओह्दे जंदरे दि'यां कुंञ्जियां
उस कुड़ी नै ब'न्नी दि'यां न
अपनी परान्दी कन्नै।
में तुप्पै करनां आं
शलैपे दी उस रानो गी
जेह्ड़ी गड़ाची गेई ऐ
बदलुएं दे टोल्ले च।
—————————
