जेह्दै यारो सागर ऐ साहित्य ठाठां मारै दा
लिखने दी उस्सी मड़ो लोड़ केह् फ्ही होर ऐ
हिरदे च न गास अन गिनत समाए दे
पैह्लें गै साहित्य कन्नै जेह्ड़ा सराबोर ऐ ।
जेह्दे च साहित्य- गुण आपूं टुरी आए दे न
भाव मौलिक होंदा नमां नकोर ऐ
जेह्दी गल्लै-बातै च साहित्य ऐ हर चर्चा च
रौंह्दा जो साहित्यकारें बिच सिरमौर ऐ ।
उस्सी ऐ फ्ही लोड़ छड़ी होरनें ई चलाने दी
भाशन सुनियै जेह्दा आई जंदा जोर ऐ
रचै केह् साहित्य आपूं ओह्दा गै सरूप ऐ जो
आपूं गै बगीचा, फुल्ल, आपूं गै जो भौर ऐ ।
साहित्य आह्ली गुड्डी हिरदे गासै जिं'दी बुत्त
होंदी उं’दी अपने गै हत्थ म्हेशा डोर ऐ
साहित्य जेह्दै ढले दा स्भाऽ च दिनचर्या च बी
बज्झा रौंह्दा ओह्दै म्हेशा खुशी आह्ला दौर ऐ ।
साहित्य सागरै नै जो ऐ होए दा इकमिक
कु'न्नै जाना कोह्दे कोल, नेईं कोई होर ऐ
साहित्यिक न हाव-भाव जेह्दे, क्रिया-क्लाप बी
जीन-शैली दार्शनिक ते तरीका तौर ऐ ।
छंदमुक्त, छंदयुक्त कविताएं दा सज्जनो
बझोंदा जिं'दे अग्गै फ्ही खप्प-खान्ना शोर ऐ
साहित्य गी साहित्य कन्नै रक्खै जेह्ड़ा जोड़ियै
इ'यै नेह् लोकें दी यारो अज्ज बड़ी थोड़ ऐ ।
फुल्लैं-बूह्टैं रुक्खैं ते मनुक्खैं जो साहित्य दिक्खै
नाड़ू- नाले , पैंछियें दी ओह्दै घनकोर ऐ
साहित्यकार सदा गै समाधि रौंह्दा, साथियो
हिरदे फड़ै तां गै भावें दी टनकोर ऐ ।
मनुक्खै दी मनुक्ख गै फ्ही करदा पन्छान ऐ
केह्, करनी उ'न्नै जेह्दा हिरदे कठोर ऐ
सराही सकै रचना निं कुसै दी जो, सज्ज्नो
अदब दे खेत्तरै च ओह्दा कम्म चौड़ ऐ ।
