पत्थर हुंदा तां
घड़ियै कोई
बनाई दिंदा मिगी देवता
जां
शैल जनानी
लोक पैरें च फुल्ल चढ़ांदे
मत्था टेकदे
जां कोई ठंडा साह् लेइयै आखदा
जे शैल जनानियां पत्थर दियां गै की हुंदियां न।
लोहा हुंदा
तां सांचे च ढलियै
बनी जंदा
हत्था च तलवार लोआरदे
कुसै ब्हादर योद्धा दी मूरत
लोक मिगी शरधा भरोची नजरें नै दिखदे।
पर
नां में पत्थर आं, नां लोहा
में ते में आं
मेरी तसीर उ’यै ऐ
जेह्ड़ी हवा दी ऐ
पानी दी ऐ
बद्दल दी ऐ
ख्याल दी ऐ
ऐह्सास दी ऐ
इं’दे आह्ंगर गै
नेईं ढली सकदा में कुसै सांचे च
एह् मेरी फितरत गै नेईं।
———————————
