बाड़ियै च खिड़े दा फुल्ल
खबरें जि’दा किन्ना ऐ मुल्ल
इ’यां खशबो खलारदा रेहा
जे अपनी खशबो च सभनें गी खिचदा रेहा।
पैह्ले पैह्र दी ताजी ब्हा च
चिड़ी इ’यां चूं-चूं करदी रेही
जे उस्स चूं-चूं च
शा'बेला सुख-सनेहा आह्नदी रेही।
चढ़दी धुप्पै चमकीली दपैह्री
जिंदगी दे सुर इक लै च
इ’यां लड़ी परोंदे गे
जे हर सुर कन्नै कदम तरक्की दी राह् बधदे गे।
मीटी दियां पोस्ती पलकां खोह्लियै
तरकालें दे साए च बंद पलकें च
दिन बेफिक्र इ’यां ढलदा रेहा
जे ढलदे-ढलदे सुत्ते सुर जगांदा गेआ।
निक्की लो च न्हेरा छंडियै
नमीं सवेर गी नरम करी गेआ
तूफानी लैह्रें च बी बलदा दीआ
न्हेरी जिंदड़ी गी शैल नुहार बनांदा गेआ।
