बगान्ने न हत्थ तेरे
नखिद्धियां सोचां मेरियां
जे इस धुखदे गोह्टे गी
सबर सनेहा पुज्जी जंदा
इस अधमोए सुखने गी
कदें फंघ जे लग्गी जंदे
तां एह् हुछला मन पखेरू
कदूं घर फ्ही औना हा
गासै-गासै चार चबक्खै
उडदे-उडदे गै रौह्ना हाँ ।
गिल्ले फंघड़ू मेरे, लोको
सूरज नमां बनांदा कु’त्थों
सोचें दी पंड खलारी
पीड़ां अ’ऊं भनांदा कु’त्थों
साहें इन्नी गरमी कु’त्थें
जे परघाली सकदे रीतां
अत्थरूं इन्ने बलवान नेईं
जेकर स्हाली सकदे लीकां
डूंह्गे खुब्भी दियां खौह्रें हत्थैं
पर कोई बी नेही लकीर नेईं
जेह्की मेला खाई जाऽ, मोइये
तेरे कोमल हत्थें नै लग्गी
अद्धा चन्न बनाई लै, मोइये ।
हत्थ केह् जानन कौड़े घुट्टैं
पीड़ें गी पीना कि’यां
चुली भरी-भरी दिंदे जैह्र
केह् जानन ऐ पीना कि’यां
उ'आं बी तेरे हत्थ, कुड़े
इन्ने गै बगान्ने न
जि’यां चन्न ते तारे न
दिक्खो ते अपने बझोंदे
पर फ्ही बी बगान्ने न
इन्ने गै अनमोल, कुड़े
फ्ही तुगी केह् थोड़, कुड़े
साढ़ी केह् लोड़, कुड़े?
