खुशी दे भ्याल जेह्ड़े, तेरे न ना मेरे न
करी लै जकीन, ओह् ते फसली बटेरे न ।
हर पल मैह्मा तेरी जि’नें-जि’नें गानी ऐ
फिरदे गै समां उ’नें अक्ख निं मलानी ऐ
जिस-जिस पाई रक्खे तुगी सदा घेरे न
करी लै जकीन, ओह् ते फसली बटेरे न ।
जिसने मुफाद लेई पैर तेरे झस्सने
उस्सै अवगुण तेरे पोटैं गिनी दस्सने
ऐसे मी तजर्बे, यरो, इक निं बथ्हेरे न
करी लै जकीन, ओह् ते फसली बटेरे न ।
खुशी दियां पोटलियां रक्खेआं छपैलियै
दाs लाई फिरै दे न खेतरैं ते गैह्लियैं
सुख-चैन लुट्टी लैंदे चंट एह् लुटेरे न
करी लै जकीन, ओह् ते फसली बटेरे न ।
‘केसर’ लेईं इज्जत, ना बिंद मनैं थाह्र हा
हेजलें दा ओह्दे कन्नै वक्ती प्यार हा
मित्तर जां हानी न, चचेरे न, मसेरे न
करी लै जकीन, ओह् ते फसली बटेरे न ।.
