अंत:करण बिच तुस इसी भरी लैओ
मौसम बदलदा मसूस करी लैओ
सारा साल थ्होंदा निं नंद एह्कड़ा
मौसमै समांदा निं रंग एह्कड़ा
मसूस होंदा जि'यां बलोंदा नीं ऐ
नजारा मते चिर एह् रौंह्दा निं ऐ
मौसम दी रूहै गी तुस फड़ी लैओ
मौसम बदलदा मसूस करी लैओ।
अमल जे एह्कड़ा कुसै ई लग्गी जा
बिन किश लैते-दित्ते नंद बज्झी जा
हिरदे दी अक्ख गुहाड़ी दिक्खी लैओ
होना जीना कुदरत कन्नै सिक्खी लैओ
हिरदे अपने च सरूर भरी लैओ
मौसम बदलदा मसूस करी लैओ।
थाह् निं बेशक कोई बी पाई सकदा
लाह् चाह् जिन्ना कोई ठुआई सकदा
इसगी मसूसना फ्ही जिन्ना सौखा ऐ
इन्ना गै ब्यान करना फ्ही औखा ऐ
नंदै दे सागरै दड़ा दड़ दड़ी लैओ
मौसम बदलदा मसूस करी लैओ।
चाही दा निं नेहा नंद कदें छड्डना
जो निं दुनिया दी चीजें बिच लब्भना
संवेदनशील बुज्झै सदा आत्मा दा नंद
निं बुज्झै जेह्ड़ा दुनियावी कैद बिच बंद
कुदरती नजारें कन्नै झोली भरी लैओ
मौसम बदलदा मसूस करी लैओ।
नंद नेईं एह् लफ्जें च बन्होई सकदा
मसूस जि'यां होंदा निं बलोई सकदा
जेह्दै निं संवेदना केह् जान्नै सज्जनो
नंद गी समेटियै जो आह्न्नै सज्जनो
हिरदे बिच बडले दा दक्ख धरी लैओ
मौसम बदलदा मसूस करी लैओ।
मसूस जि'यां होंदा जे उ'आं बलोई जा
साख्यात माह्नू गी तां रब्ब थ्होई जा
खुशी च फ्ही नच्ची पवै ओह्दा अंग-अंग
बज्झी र'वै ओह्दे जीवनै च फ्ही नंद
बेशक नेईं बलोऐ प मसूस करी लैओ
मौसम बदलदा मसूस करी लैओ।
चढ़दे आह्ली जेह्दै बी सनैह्र डु'ल्ली जा
ओह्दे लेई धरती पर सुर्ग उ'ल्ली जा
असली ओह्दै जीवनै फ्ही रंग छाई जा
जीने दा बी उसगी फ्ही नंद आई जा
जीने दा तुस सज्जनो सिरा फड़ी लैओ
मौसम बदलदा मसूस करी लैओ।
——————————————-
