में बद्दलै दा इक निक्का टोटा
बंजर रुक्खे रेगिस्तानै उप्पर उड्डां
सोचैं पेदा—
ब’रां, नेईं ब’रां
में बद्दलै दा इक निक्का टोटा ।
इत्थै ब’रना ऐ कित्त कारी
ना में बूह्टें दी नाड़ें इच्च बगना इत्थै
ना घोलियै रंग रंगने फुल्ल में इत्थै
ना भरने तलाऽ-बौल्लियां
स’ञ घरोंदे, घर परतोंदे चिड़ियें
ना मिगी छंबे लाने
इत्थै ब’रना ऐ, कित्त कारी !
जां फ्ही इन्ने जोरै कन्नै ब’री जां इत्थै
सारी रेत रढ़ाई देआं
ते फ्ही प्हाड़ें उप्परा ढोइयै
सजरी मिट्टी आह्न्नां इत्थै
दूर कुतै जां उड्डी जां
जित्थै तरेहाई दी धरती मी बलगा दी
अपनी कुक्खा च लैने गी
ते जनने गी फुल्ल ते बूह्टे
में बद्दलै दा इक निक्का टोटा
बंजर रुक्खे रेगिस्तानै उप्पर उड्डां
सोचैं पेदा—
ब’रां, नेईं ब’रां
में बद्दलै दा इक निक्का टोटा ।
……………………………….
