ब’रके

चिट्ठी सुक्ख- सनेह् जां आले
चेता करेआं कदें-कदालें। 

चेता जदूं बी औंदा
कालजै इक बखोड़ा पौंदा। 

तु’म्मी आइयै दिक्खें भालें
चेता करेआं कदें-कदालें। 

दक्ख पराने अक्खीं फिरने
छम-छम करियै मोती किरने 

हर पल रौंह्ना तेरे ख्यालें 
चेता करेआं कदें-कदालें। 

सोचें रौह्ग सदा गै चोनां 
इ’यै हाल तेरा बी होना। 

दिनें दपैह्री जां तरकालें
चेता करेआं कदें कदालें। 

पिछले ब’रके किश परतायां, 
लिखेआं जां फ्ही मिली सनायां। 

तेरी लंघा दी कुस हालें
चेता करेआं कदें-कदालें। 
——————————