बरखा अज्ज ब’रा दी ऐ रंग बदलाइयै
जुआनी इस्सी चढ़ी ऐ, गड़ूके मारी आई ऐ
इक पासै ब’रा दी ऐ, दूए पासै छाई ऐ
जुआनी इस्सी चढ़ी ऐ, गड़ूके मारी आई ऐ।
आप-मुहारी गरजै अंबरै दे छत्त एह्
घोगडै गी लेई औंदी फगडी अपने हत्थ एह्
पान इ’न्न दित्ती ऐ सौन दी चढ़ाई ऐ
जुआनी इस्सी चढ़ी ऐ, गड़ूके मारी आई ऐ।
जित्थै एह्दी गरज ऐ, नखरे एह् करा दी
सोआगन बनी टुरी गेई, चूह्कें जाई बडा दी
नौजुआन नाला दिक्खी करा दी तबाही ऐ
जुआनी इस्सी चढ़ी ऐ, गड़ूके मारी आई ऐ।
बारी- बारी पानी एह् हर पासै बंडा दी
दिनै कैह्र धूंऐं कन्नै, रातीं तरेल छंडा दी
हर पासै गुड़कै दी ऐ बाहें चूड़ा पाइयै
जुआनी इस्सी चढ़ी ऐ, गड़ूके मारी आई ऐ।
फिरी-फिरी हिरखी चंडां मुंहै उप्पर लांदी एह्
छन-छन पंजेबां बज्जन, भुञां ठनकांदी एह्
सभनें गी दिंदी उप्पर छतरी चढ़ाइयै
जुआनी इस्सी चढ़ी ऐ, गड़ूके मारी आई ऐ।
गरीबू दा एह् घर लेई जंदी ऐ रढ़ाइयै
अमीरू गी एह् दिंदी पक्की बिल्डिंग बनोआइयै
कुसै दा निं डर इस्सी, दिंदी शैल तराई ऐ
जुआनी इस्सी चढ़ी ऐ, गड़ूके मारी आई ऐ।
रंगें भरी पींह्ग चाढ़ी झूटे एह् लैंदी ऐ
हाड़ म्हीनै अग्गें-पिच्छें पाह्लां एह् पांदी ऐ
कस्सियें ते नालें, दरेआएं हाड़ छुडै बगाई ऐ
जुआनी इस्सी चढ़ी ऐ, गड़ूके मारी आई ऐ।
पाइयै कलाबा ‘कुंडरिया’ त्रीह्की लेई जंदी ऐ
माह्नुएं दी गल्ल छोडो, प्हाड़ चूस्सी लैंदी ऐ
केईं फेरे दरेआ चनाब माह्नुएं दे लाई ऐ
जुआनी इस्सी चढ़ी ऐ, गड़ूके मारी आई ऐ।
———————-
