आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
पढ़े-लिखे दे जागत-कुड़ियां नौकर इ’नें कराने न
सब्ज-बाग लोकें गी दस्सी केह्-केह् जाल बिछाने न
हर बारी अस मूरख बनदे, झुंड इं’दे नेईं खोह्लदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
सड़क, बिजली ते पानी हुन घर-घर इ’नें पजाना ऐ
अपना नींह्-पत्थर रक्खी घर-घर ढोल बजाना ऐ
पैरैं पौंदे, हत्थ जोड़दे, पिच्छुं एह् न रोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
हारे-हुट्टे बुड्ढियां-बुड्ढे दफ्तर चक्कर लाई जी
अद्धे राम-प्यारे होई गे नेतें दे घर जाई जी
पैन्शन उं’दी फ्ही नेईं लग्गी, रेह् टाल-मटोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
हिंदु, मुस्लिम बंडां पाई असेंगी एह् लड़ांदे न
मंदिर ढाओ, मस्जिद ढाओ इ’यै किश सिखांदे न
मन मैले ते चिट्टे टल्ले, नेईं मैल मना दी गोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
वोट मंगन औन जेल्लै, गल्लां चार सुनाएओ जी
भुञां कोल शैल बठाई एह्का भेत कढाएओ जी
छे साल तुस केह्ड़े दफ्तर फाइलां रेह् फरोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
सोची-समझी वोट पाएओ सारे रिश्वतखोरें गी
गल्ल एह् समझानी जाइयै नाते-रिशते होरें गी
सिर मनाइयै पिच्छुं रौह्गे नेईं तां चौरी झोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे !
पोस्टर, झंडे, नाह्रे हुन घर-घर इ’नें लाने न
तुसें बी सारें अग्गें बधियै सुत्ते लोग जगाने न
मौका हत्था नेईं गोआएओ, रौह्गे पक्खी झोलदे
आई गे बरसाती डिड्डू दिक्खो कि’यां बोलदे
बन्न-सबन्ने लाई मर्हक्खे कि’यां लस्सी छोलदे ! .
