लोआद—
मेरे सामनै उसदी दुर्गति होंदी रौंह्दी ही
ओह् अपने भागें पर रोंदी रौंह्दी ही ।
उस दिन ते किश अति गै होई गेई ही
उसने किश निं हा खाद्धा, बस्स फुट्टी-फुट्टी रोई ही
जिसलै उसदी सस्सु ने अपने पुत्तरै गी
दुए ब्याह् ब्याह्ने दी गल्ल कीती ही
उस दिन उस बचारी पर बड़ी माड़ी बीती ही
“एह् बे-लोआद ऐ, इसलेई इत्थै कोई थाह्र नेईं
इस्सी प्योकै छुड़ी आओ
साढ़े कोला चकोंदा इसदा भार नेईं ।”
उसने अत्थरूं पूंझे हे, थ्हौगलु कुंजे हे
घड़ेआलियै दा घड़ु चुक्कियै लाया हा ढाकै
अश्कै आखा दी होऐ—
जे मत कोई अग्गड़ताईं मिगी बे-लोआद आखै।
सोचें च पेदी ओह् बाईं पर पुज्जी ही
भुक्खी-भानी ते अंदरा जली-भुज्जी ही
ढाके परा घड़ु बाईं पर रक्खी
परसिज्जली गेइयां हियां उस दियां अक्खीं
ते आपमुहारे गै घड़ुऐ कन्नै गल्लां करन लगी ही
दिलै दा बोआल कढदे-कढदे, अक्खीं राहैं ब’रन लगी ही
“मड़ा, तु’म्मी ते मेरे कन्नै किन्ना हिरख लान्ना ऐं
मेरा साथ दिन्ना ऐं ते मिगी ठंडा पानी पलान्ना ऐं
मि’म्मी ते तुगी अपना जागत समझियै ढाकै लान्नी आं
मि’म्मी ते तुगी किन्ना हिरख लान्नी आं। ”
एह् आखदे-आखदे
ओह् घड़ुऐ गी अनसंभ लाड लान लगी ही
ते हुन ओह् सभनें गी इ’यै गलान लगी ही
“मेरा घड़ु मेरा ञ्याणा ऐ, मेरा घड़ु बड़ा सेआना ऐ
में इसदी मां आं ते बां बी इसदी मां ऐ
इसगी दौनीं मौरीं दी ठंडी छां ऐ
लोको, में बे-लोआद नेईं
लोको, में बे-लोआद नेईं ।”
