मनै गी फंघ लग्गे दे होंदे न
इं'दी डुआरियें कशा अनजान निं में
पर अज्ज कल इसगी लम्मे-लम्मे कन्न,
निक्की नेही (अ)बाज़
ते
बड्डियां-बड्डियां अक्खीं बी लग्गी गेदियां न
वुहान, इटली, यूक्रेन, अफगानिस्तान, श्रीलंका
निजामुदीन
पालघर आदि गाही औंदा ...
ढेरों-ढेर जानकारियां
ढेर-ढेर अपराधक चुप्पियें च छडकदा
सोशल मीडिया पर
बन्न-सबन्ने,
बेचैन, शगूफे
दिखदा-सुनदा
बेबस, रुनाका जन
बुक्कल मारी
सत्यम् शिवम् सुंदरम् दी बित्थें बश्कार
पद्म-आसन लाई
अक्खीं मीटी
लम्मा उज्जैई साह् भरी
चेतना दी जोत बाली
पूर्ण समर्पण कन्नै,
साहें दे इकतारे दी संगत च
आई बौंह्दा
प्रेम भरोचे पद गान।
——————————
