अनुशासन--
सब्भै भाशा दी विराटता नै परिचे करन
नेईं डरन-तराह्न दिक्खी मानकीकरण
भाशा गुग्गल दी सदी बिचा गुजरै दी ऐ
करनी पौनी ऐ ग्रैह्ण व्याकरण दी शरण।
भाशा चढ़ी गेई शमान निं रेही ख'ल्ल ऐ
एह्दा गुग्गल च औना बड़ी बड्डी गल्ल ऐ
सारी उमरी दे प्रयास न सफल गे होई
ते सुरक्खत बी होई आ एह्दा कल्ल ऐ।
हर भाशी नै भाशा दी पंछान सज्जनो
साहित्य बिच जेहदा मान-सम्मान सज्जनो
गलत ढंगै नै इसी तुस छेड़ियै ते दिक्खो
लगी पौंदी ऐ जोरें नै करलान सज्जनो।
बक्ख भाशा शा निं भाशा विज्ञान सज्जनो
व्याकरण दा बी इस्सै च ऐ ज्ञान सज्जनो
दस्सै विज्ञान कुत्थूं, कि'यां, केह् बलोंदा ऐ
गलत-स्हेई दा व्याकरण दिंदी ज्ञान सज्जनो।
शब्द म्हेशां कम्प्यूटर ने मानक चुक्कना
बाकी समझी कूड़ा-कर्कट उस बाह्र सु'ट्टना
स्हेई शब्दें नै गै होनी ऐ ओह्दी पंछान
स्हेई रूप इस्सै लेई तुसें पौना तुप्पना।
गलती तुं'दी कम्प्यूटर ने नेईं सुधारनी
मूंह् दिक्खियै बी चंड उन्नै नेईं मारनी
पेई जानी फ्ही सम'ग्गरी अशुद्ध खूहै च
पौनी भोगनी कीती दी तुसें पौनी स्हारनी।
स्हेई शब्द ऐ ब्रह्म, स्हेई शब्द नाद ऐ
स्रिश्टी बिच एह्दा म्हत्त्व एह्दा गै राज ऐ
अशुद्ध शब्द बे अर्थ रौला रप्पा सज्जनो
बिन सिर -पैर आह्ला जो बे सुरा राग ऐ।
हर भाशा च होंदा इक अनुशासन ऐ अनूप
होंदा व्याकरण बी उसदा गै विकसत रूप
जिस कन्नै बनी रौंह्दी ऐ व्यवस्था भाशा च
सामधाम उ'ऐ व्याकरण दा रूप ते सरूप।
इ'यै व्याकरण ऐ, होर निं कोई भूत प्रेत
तुस ऐह्में निं तराहो मड़ो पाओ एह्दा भेत
इसी हौआ समझी औखा निं बनाओ सज्जनो
भाशा बनदी ऐ भाशा एह्दी रूहै दे समेत।
भाशा बिच होऐ जे नेईं कदें अनुशासन
समझै कदें बी नेईं आवै फ्ही कुसै दा भाशन
अनुशासन गै भाशा ते साहित्य ऐ सज्जनो
व्याकरण दा ऐ तां गै इन्ना उच्चा आसन।
मानक शब्दावली दा गै हुन होना अनुवाद
शुद्ध शब्दें गी गै थ्होना हुन शुद्ध ऐ जवाब
मूंह् मलाह्जा नेईं कम्प्यूटर ने बिंद रक्खना
भाशा होग अशुद्ध जेह्दी होग ओह् खराब।
चौह्दें सूतरें बनोए दा ऐ जाल सज्जनो
स्रिश्टी भाशाई दा जिस च कमाल सज्जनो
भरी दस्सै जेह्ड़ा सागरै गी गागरै दे बिच
लब्भा दुनिया च माई दा निं लाल सज्जनो।
————————-
