सोच दमागी हिरखी करदा, रगें दी एह् तस्वीर
जीह्बा उप्पर चूंढी भरियै रखचै सब मखीर
रिश्ते नाते मिट्ठे करदा, मूंह् बैरी दा मिट्ठा
कुड़में गी एह् गलें मलांदा, कन्नै डब्बा पिट्ठा
तुप्पन इसदी हर कोई चढ़दा उप्पर बूह्टैं सीर
जीह्बा उप्पर चूंढी भरियै रखचै सब मखीर
सोच दमागी हिरखी करदा, रगें दी एह् तस्वीर।
जीह्ब ते गल कौड़े जिं’दे मिट्ठे एह् करांदा
रुक्खे फ़ुल्के टिंबी कन्नै सुद्धा सोआद बनांदा
खु’ल्ल- मखु’ल्ला मिलदा
एह् बी डोगरें दी लैओ एह् मंडी
हिरखै कन्नै इस्सी खाचै सब्भै बंडी-त्रंडी
अक्ख’ मिट्ठे एह् लखांदा पढ़ो हां इक लकीर
जीह्बा उप्पर चूंढी भरियै रखचै सब मखीर
सोच दमागी हिरखी करदा, रगें दी एह् तस्वीर।
छेड़ाखान्नी करो जे कन्नै बड्ढी खंदा ई भौर
इ’यां निं एह् थ्होंदा जे तुसकरो लड़ाई ते शोर
नेईं कराओ जे हुज्जां इस्सी एह् कदें नेईं ठाकै
हिरखै कन्नै लैओ नचोड़ी एह् निं किश बी आखै
सदा गै इसदी हिरखी रेही ऐ मिट्ठी-खंड तसीर
जीह्बा उप्पर चूंढी भरियै रखचै सब मखीर
सोच दमागी हिरखी करदा, रगें दी एह् तस्वीर।
खंघ लग्गै जे चक्खो मिक्की करना शर्ती बंद
हिरखै कन्नै मिक्की बलाएओ होगेओ नेईं तुस तंग
आ’ऊँ जे मिट्ठा जीह्बा लग्गनां, बोल्ली की ऐ कौड़ी
रूहें बिच्चा कौड़तन कड्ढी दिंदे की निं छोड़ी
खंदे मिक्की पंत-मौलवी कन्नै पीर-फ़क़ीर
जीह्बा उप्पर चूंढी भरियै रखचै सब मखीर
सोच दमागी हिरखी करदा, रगें दी एह् तस्वीर।
कादर कुंडरिया जीह्ब निं घसदी हिरखी मूंह् जे खोह्ल्लैं
ओ मेल-मलाप गूढ़े होंदे मिट्ठा जे तूं बोल्लैं
बोल्ली मिट्ठी बोल हां मड़ेआ आखै निं कोई कौड़ा
लै भरी किश रूहें अंदर एह् मखीर हुन थोह्ड़ा
समाज दे अंदर बदली देचै ज़ैह्र कौड़ी तसीर
जीह्बा उप्पर चूंढी भरियै रखचै सब मखीर
सोच दमागी हिरखी करदा, रगें दी एह् तस्वीर।.
