दूर करी मनै दी खटास दनां, सज्जनो
रिश्तें च आह्नेओ मठास दनां, सज्जनो ।
इ'यै जीह्ब मिट्ठा ते इ'यै कौड़ा बोलदी
इ'यै चाढ़ै घोड़ै ते इ'यै भुञां रोलदी
मिट्ठे दा गै करेओ भ्यास दनां, सज्जनो
रिश्तें च आह्नेओ मठास दनां, सज्जनो ।
हिरखै दे सौदे दी शैल रास पाओ हां
खरी चीज देइयै, आपूं बी कमाओ हां
फर्क नियों पौंदा किश खास दनां, सज्जनो
रिश्तें च आह्नेओ मठास दनां, सज्जनो ।
बंडगे जे खुशियां तां खुशियां गै थ्होनियां
मंदियां निं बोलगे तां मंदियां की खोनियां
होगे नियों कदें बी दुआस दनां, सज्जनो
रिश्तें च आह्नेओ मठास दनां, सज्जनो ।
होई जाने भाव मनै सब नौन-पौने न
मनै दे बगीचै सदा फुल्ल खिड़े रौह्ने न
रक्खेओ बनाई इक आस दनां, सज्जनो
रिश्तें च आह्नेओ मठास दनां, सज्जनो ।
