खज्जल निं हो ऐह्में तीरथें तूं जाइयै
होना मन शुद्ध नेईं डुबकियां लाइयै।
समां नेईं गुआऽ ऐह्में मन्न मड़ा गल्ल
इस चाल्ली निकलना सज्जना नेईं हल्ल
दुखें शा होना तेरा कदें छुटकारा नीं
गलत कम्में आह्ला जे छड्डेआ दुआरा नीं
किश बी निं होना दुआई खाई-खाइयै
होना मन शुद्ध नेईं डुबकियां लाइयै।
इलाज छड़ा कर नेईं, परेह्ज बी तूं रक्ख
परेह्ज बिन कर भाएं बशक्क इलाज लक्ख
दुख-तकलीफ मड़ा आरजी गै हटनी ऐ
कारण निं पुटगा तां भलेआं निं घटनी ऐ
तापै ने मुड़ी-मूड़ी चढ़ना फ्ही आइयै
होना मन शुद्ध नेईं डुबकियां लाइयै।
छड़ी तकलीफ ढाऽ नीं ढाऽ तूं मड़ा कारण
तां गै तेरे दुखें दा होग फ्ही निवारण
टाह्ल्लियां निं छिंब छड़ियां जढ़ें शा तूं पुट्ट
बमारी आह्ली जढ़ गी तूं पुट्टियै सु'ट्ट
बधग बमारी होर पेन किल्लर खाइयै
होना मन शुद्ध नेईं डुबकियां लाइयै।
ईरखा, द्वेश, घृणा, त्रिश्ना निं चुक्कग
बमारी तेरी दस्स तूं कि'यां फ्ही मुक्कग
सद् कम्में आह्ली ऐंटीवाइटिक चढ़ा तूं
ताप तुआरने गी तीरथें नेईं जाऽ तूं
उ'आं पैरासिटामोल रक्ख बोझै पाइयै
होना मन शुद्ध नेईं डुबकियां लाइयै।
हर तेरी इंद्री इंफेक्शन ग्रस्त ऐ
मनोबल तेरा, तां गै सज्जना अस्त ऐ
दोशयुक्त हिरदे करी सारे एह् विचार
विकृत एह् होइयै बनी गेदे न विकार
रखदे न तां गै तुगी ताप एह् चढ़ाइयै
होना मन शुद्ध नेईं डुबकियां लाइयै।
प्राह्ल्ली क्रियाएं बिच तूं मता लीन ऐं
असली अवस्था बिच अत्त दीन-हीन ऐं
इक्कै बारी तीरथें दा चाऽ एह् चुक्की जा
कथनी ते करनी बिच भेद कदें मुक्की जा
इ'यै मारै करदी ऐ सज्जना फसाइयै
होना मन शुद्ध नेईं डुबकियां लाइयै।
———————————————-
