मन नेईं करदा

ठंडी नैह्‌रा गोते लाने गी   
बागैं माकड़ियां चुराने गी
पार बागैं ग’रने-बैर खाने गी 
हुन मन निं करदा ।

चिट्टी बर्दियें दा पीछा करने गी  
अडोल गै चिट्ठी फगड़ाने गी
माल रोड शामी चक्कर लाने  गी
‘कम सेप्टेंबर’ आह्‌ली ट्विस्ट करने गी
हुन मन नेईं करदा ।

देआरें बश्कार 
सैल्ली दब्बडी उप्पर
शनील दे सूटै आह्‌ली दी खश्बोई च गुच्च्च होई
सुर्गी पींह्‌गा झूटने गी
सन-टब्बरे बसोआ दिक्खने गी
लम्मे  पैंडै साथ नभाने गी
हुन मन नेईं करदा ।

हुन कल्ल-मकल्ले 
मुकदी बत्ता
निग्घे चेते
बसारने गी
मन नेईं मनदा
मन नेईं करदा।