मन नेईं मनदा, मन नेईं करदा

ठंडी नैह्‌रा गोते लाने गी   
बागैं माकड़ियां चुराने गी
पार बागैं ग’रने-बैर खाने गी 
हुन मन निं करदा
चिट्टी बर्दियें दा पीछा करने गी  
अडोल गै चिट्ठी फगड़ाने गी
मालरोड शामी चक्कर लाने  गी
‘कम सेप्टेंबर’ आह्‌ली ट्विस्ट करने गी।

हुन मन नेईं करदा
देआरें बश्कार 
सैल्ली दब्बडी उप्पर
शनील दे सूटे आह्‌ली दी खश्बोई च गुच्च होई
सुर्गी पींह्‌गां झ़ूटने गी
सनटब्बरे बसोआ दिक्खने गी
लम्मे पैंडे साथ नभाने गी
हुन मन नेईं करदा ।

हुन कल्ल-मकल्ले 
मुकदी बत्ता
निग्घे चेते बसारने गी
मन नेईं मनदा
मन नेईं करदा ।