नां लछमन नां सीता कोई
एह् कल्ल- मकल्ला सन्यासी
जाड़ैं-प्हाड़ैं बतदा रौंह्दा
एह् गंढी पाइयै दुआसी
इस कदूं घरै गी परतोना
एह् मन उमरें दा वनबासी ।
मन गै जेकर कोल निं होऐ
कुस दीआ अंगनै जगाना
न्हेर -मन्हेरी इस आसा गी
कुस पुन्नेआ भला बनाना
अद्ध मझाटै टंग्गन इसगी
नेईं तांह्गां छुड़न खलासी
इस कदूं घरै गी परतोना
एह् मन उमरें दा वनबासी
जद बनियै रात सरूपनखा
कुतै सिरै उप्पर मंडरांदी
कल्ला लड़दा उसदे कन्नै
जदूं मनै गी घेरा पांदी
क्यास निं करदी एह् मासा बी
जद नित्त सतांदी बेक्यासी
इस कदूं घरै गी परतोना
एह् मन उमरें दा वनबासी ।
अंह रूपी राक्स कोई जो
इसदा रोकी लैंदा रस्ता
नां गै भविशन लभदा कोई
नां गै हनुमान आंह्गर भक्ता
अपने जोरें जोर लड़ांदा
एह् मन कल्लेपन दा बासी
इस कदूं घरै गी परतोना
एह् मन उमरें दा वनबासी।
बिन पैरें भटकी जंदा एह्
बिन फंघै उड्डरी जंदा ऐ
बिंद बसांऽ निं करदा मोआ
भां जिन्ने ठेड्डे खंदा ऐ
रोज अक्खीं दे सागर छलदे
इसदी रूह सदा गै प्यासी
इस कदूं घरै गी परतोना
एह् मन उमरें दा वनबासी
