मां झील ऐ
उस्सी अपना बज्झे दा दायरा
बझोंदा ऐ इक बंद्धे आंह्गर
आखो कमरबंद कोई जि'यां
उस्सी महसूस गै नेईं होंदा
जे ओह् बज्झी दी ऐ
ओह्दी मसनूई बख्तावरी दा घोट
मिगी द्रवित करदा ऐ पर।
में दरेआ आं
बगदा दरेआ
ठाठां मारदा
कंढें दा मान रखदा कदें
कदें लोआंघी, रोढ़ी लेई जंदा
कंढें गी आपरशें च
अपने कन्नै।
मेरे आंह्गर किन्ने दरेआ
अपनी सग्गोसारी
सरदारी-खुदमुख्तयारी
दा ढंढोरा पिटदे
झंडे हत्थें च लेदे
कैह्लां बजांदे
सशक्तिकरण दी
गड़गज्ज पांदे
पसोते दे
नियति कशा बेखबर
खचोंदे जा' रदे न
कुसै डूंह्गे समुंदरै च
विलीन होने गी।
समुंदरै दे दायरे च
कैद होने लेई
सदा लेई।
