पटल--
किन्नियां तफसीलां
किन्ने खलार
किन्ने त्राड़
मानस-पटल पर।
मैह्कदे किश रिश्ते
सराकदे किश लोक
किश सूखम ऐह्सास
सैह्कदे, सैह्मे जज़्बात
किश मार्मिक हादसे
किश गल्लां--
आखी-गलाई दियां
सुनी-सनाई दियां
कुंडे बनकाई लैंदियां
कुंडे चुभदे
जे बनके रौह्न,
खंडाने पर करदे
ल्हु-लोहान
बो उक्कड़दे नेईँ फ्ही बी।
फैसला होई गेआ हून-
कुंडे बनके दे रौह्न
सिमकदे रौह्न
रिसदे रौह्न
सरलाटे पांदे रौह्न ।
बो रिसाव आह्ली स'ल
संघेली जाs ।
स्याही दे तौरा बरती जाs
सरेआम कीत्ती जाs
लीके जान
कोरे-कोरे चिट्टे काकल
सीकी लैना इ’नें सब किश
सब्भै तफसीलां,खलार,त्राड़।
फ्ही लग्गनी ठमकार
जतुं पौनी सुन्न-मसान
फ्ही कुतै होना सुर्खरू
मानस-पटल ।
