जे में ओह्दे साहीं बनना ऐ,
में अजें होर तड़पना ऐ
अजें में होर धुखना ऐ
अजें किश ते पल गुजरे न
मेरे च अजें मेरे सुखने सजरे न
में मता किश अजें करना ऐ
जे में ओह्दे साहीं बनना ऐ ।
में इन्ने तौले कीs थक्की गेआ
इन्ना कीs पक्की गेआ
ओह्दे लेखा घुटना ऐ
ओह्दे लेखा छड़कना ऐ
अक्खीं चा तोपे रु’लकन निं देने
में अजें मेरे आंह्गर अधूरा आं
में अजें पूरा होना ऐ
जे में ओह्दे साहीं बनना ऐ ।
में अजें उस आंह्गर सारे सुखने मारने न
अजें उस साहीं फोके हासे हस्सने न
जान जाने आह्ली उस स्थिति च अजें पुज्जना ऐ
में अजें निश्चिंत कि'यां सेई सकनां
सारी-सारी रात अजें अक्खीं च कड्ढनी ऐ
ओह् छड़पनी अजें छड़पनी ऐ
जिस भट्ठी च ओह् तपेआ हा
उस चा अजें लंघना ऐ
में अजें ओह्दा जीन जीना ऐ
में अजें बड़ा किश पीना ऐ
में अजें जीना ऐ
में अजें ओह्दे साहीं बनना ऐ
में अजें जीना ऐ
