हां, में कातल आं
रोज गै किन्ने कतल करनां
किन्ने गै
कोमल, नाजक, निर्मैल, सच्चे-सुच्चे
भावें दा कतल करनां
जेह्ड़े रोज मेरे मनै च औंदे न
कदें मिगी स्हांदे
कदें रोआंदे
कदें लाड्डै नै गल्लां बी करदे न
ते
में कुसै अत्याचारी साहीं
उ’नेंगी अपने अंदरै दी भखन कन्नै
अपने अंदरै दी अग्गी कन्नै
रोज गै साड़नां-फूकनां
एह् अग्ग ते हिस्सलनी नेईं
जदूं तगर में जीना ऐ
एह् मेरे कन्नै रौह्नी ऐ
ते
में रोज गै नमें मर्हक्खे लाई-लाई
इ’नें भावें गी मारने
दफन करने लेई मजबूर आं
इ’नें भावें गी नां वाणी थ्होंदी ऐ
नां कागज ते नां गै स्याही
एह् रोज आइयै मेरे च उगदे न
मठोन लगदे न
मठोंदे बी न
पर में इ’नें गी अपने च गै समाधि देई दिन्नां
हां, में कातल आं ।.
