हुन इल्म कताबां छुड़कै दे
इक जोत अलौकी जम्मै दी
हुन स्हाब-सलीके कित्त कारी
निं अकल रेही किश कम्मै दी।
हुन जीभ तालुऐ लग्गी दी
केह् गल्ल करां, में केह् आखां।
हुन केह्ड़ा नाफा फुट्टै दा
में केह् दस्सां, में केह् आखां ।
किश डोर- भौर में रौह्न्ना आं
मस्ती जेही तारी रौंह्दी ऐ
हुन होशें दी निं गल्ल करो
इक अजब खमारी रौंह्दी ऐ।
उ’नें अक्खें दी केह् गल्ल करा
जि’यां कोई भांबड़ बलदा ऐ
उस मुखड़े दा में केह् दस्सां
कोई तूर नूरानी लभदा ऐ।
उस मिलन दी मस्ती केह् दस्सां
हुन लूं-लूं मेरा कंबदा ऐ
हुन गीतें दा निं मुल्ल कोई
सुन्नै दी मस्ती रौंह्दी ऐ।
हुन लोक-लाज दी चिंता नेईं
पैरैं झांजर बजदी रौंह्दी ऐ।
हुन रंग निं चढ़ना होर कोई
ओह् रंग ललारी करी गेआ
तूं आखनां मेरा सिर फिरी ‘आ
में आखनां, में ते तरी गेआ।
………………………………
Vikas Mangotra
