मेरा एह् जतीम कल्लापन
जिसलै बी
तुगी चेता करदा ऐ
तां
मेरे अंदर
मसूम कोई बच्चा
निग्गोसारें आंह्गर
तेरी ममता गी मता तरसदा ऐ
पर तू नेईं लभदी ते
ओह् रुलदा ऐ थां-थां
तुपदा ऐ
केईं अनजानें चेहरें च तुगी
पर तूं नेई पनछोंदी
ते ओह् घटोंदा ऐ अपने-आपै च
पर दसदा नेईं पीड़ अपनी
मसूसदा ऐ तुगी
ब्हाऊ दे फनूकें च
अपने हत्थें
अपने शरीरै च
जेह्के तेरे गै ते हैन
पर तूं नेईं।
ते लाइयै गले कन्नै
ओह् लैंदा ऐ कश्बो
तेरे लाडें दी फ्ही
उ'नें टल्लुएं चा
जेह्के गं'डी -गं'डी कित्तरां
झल्लियै घाऽ
सूइयें दे तूं
बनाए हे
ओह्दे लेई
चाएं-चाएं।
ते करियै
तेरी गोदा गी फ्ही चेतै
ओह्
रक्खियै गोडें पर सर
सेई जंदा ऐ फरनोहियै
पर तूं नेईं लभदी माए
तूं सुखने च बी नेईं लभदी।
————————-
