केह् दस्सां, केह् हा, मेरा ओह्दा प्यार
मिट्ठी-मिट्ठी पीड़, चेत्तें दा खलार ।
किश सरकंडे मेरे कालजे च खुब्बे दे
नि’म्मा-नि’म्मा जैह्र, मासां जेहा बखार ।
नैनें दी त्रिक्खी, दिलै दी ही चोरती
ते नशेआई जेही सप्पनी दी चाल ।
कोसी जेही ब्हाऊ च, ओह्दियां सगंधियां
फुल्लें साहीं खिड़ेआ, मैह्कदा शबाब ।
किश सि’ल्ले-सि’ल्ले, मेरे नांऽ खत ओह्दे
खशबो भरोचे दा इक रेशमी रमाल ।
डायरियें च पेदे सुक्के दे गलाब-गुट्टे
किश मोरपंख, किश गल्लें दा मलाल ।
किश मेरे हौंसले, किश ओह्दी कशमकश
जातियें दे फासले, लोकें दा बबाल ।
हंसे दी जूनै हा , मोतियें गी हांबदा
ओह्दा चोग मैंह्गा, में हा कंगाल ।
उ’आं ते हा फासला, इक-दो गैह्ली दा
उमरें दे पैंडे साहीं, होआ निं पार ।
ओह्दा जोर चलेआ, ना मेरा गै कोई
डोर मदारी हत्थ, ओह्दे गै कमाल ।
कोई साह् साहैं मेरे, कदें-कदें मैह्की जंदा
जि’यां कोई बेरुत्तें, खिड़ी जाऽ गलाब ।
किश ओह्दे हास्से, अजें बी खनकदे
पाई पजेबां फिरै, जि’यां कोई नार ।
हुन ओह्दे चेतें, किश हिस्सले-हिस्सले दे
अक्खें उप्पर होई जि’यां उमर सोआर ।
इन्ना गै दोस्ता, साढ़ा एह् फसाना ऐ
दिलै च बुआल, अक्खें च छुआल ।
