धरत-शमान सब तेरा ऐ
फ्ही की एह् मेरा-तेरा ऐ।
दुनिया रैन बसेरा ऐ
किश निं मेरा-तेरा ऐ।
एह् चढ़दा सूरज तेरा ऐ
एह् स’ञ घरोंदी तेरी ऐ
बिजली दी लिश्कन तेरी ऐ
एह् न्हेरे-मन्हेरा तेरा ऐ।
फ्ही की एह् मेरा-तेरा ऐ
जे दुनिया रैन बसेरा ऐ
किश निं मेरा-तेरा ऐ।
चन्नै दी ठंडक तेरी ऐ
सूरजै दी तपश तेरी ऐ
एह् रोढ़ू पानी तेरा ऐ
एह् सीमत छप्पड़ तेरा ऐ
फ्ही की एह मेरा-तेरा ऐ
जे दुनिया रैन बसेरा ऐ
किश निं मेरा-तेरा ऐ।
एह् जंगल-जाड़ तेरा ऐ
फुल्लें दी ब्हार तेरी ऐ
एह् रौला-रप्पा तेरा ऐ
एह् सुन्न-मसान तेरा ऐ।
फ्ही की एह मेरा-तेरा ऐ
जे दुनिया रैन बसेरा ऐ
किश निं मेरा-तेरा ऐ।
एह् रुके दा साह् तेरा ऐ
एह् दिलै दी धड़कन तेरी ऐ
एह् जंदा माह्नू तेरा ऐ
एह् औंदा माह्नू तेरा ऐ।
फ्ही की एह मेरा-तेरा ऐ
जे दुनिया रैन बसेरा ऐ
किश निं मेरा-तेरा ऐ।
फ्ही की एह् मेरा-तेरा ऐ।
