मेरा शैह्र
किश मंदरें, मैह्लें ते खंडरें दा
बरखा इसगी नुहालदी ऐ
सूरज-पुत्तरी इसगी सुच्चा करी ओड़दी ऐ ।
शैह्रै दे हर चौकै च
उच्चे थढ़े उप्पर सज्जी दियां
बराजमान किश आदमकद मूरतां
मेरे पूर्वज महाराजे
वीर योद्धा ते राजनेता दियां न ।
ब’रै च इक बारी कट्ठ होंदा हा
फ्ही वीरगाथां—
बारां-कारकां गाइयां जंदियां हियां ।
इ’नें चौकें च कट्ठ अजकल्ल बी होंदा ऐ
पर
खलगत कारकां-बारां निं गा दी होंदी
मूरतें दे अग्गें-पिच्छें जिंदाबाद-मुर्दाबाद होंदा ऐ
इक कट्ठ बेरोजगारें दा
इक कट्ठ मजदूर करसानें दा
इक कट्ठ छड़ी सियासत दा ।
मेरे शैह्रै दियां एह् मूरतां हुन
भलेआं गै बुत्त बनी गेदियां न ।.
