मेरे साथिया, मिकी मुरली बनाई लै
ते लाई लै मिकी अपने नाज़क जेह् ओठैं
मत सुर कोई जाग्गै मेरे सत्तें छेदैं
मत गीत गूंजै फ्ही कोई भुल्ला-बिसरा
मत ठंड पेई जाऽ मेरै दुखदे सीनै
ते मुक्की जाऽ रोजै दा दुखना एह् मेरा
सदा लेई, सदा लेई
सदा लेई, सदा लेई
मेरे साथिया, मिकी मुरली बनाई लै ।
मेरे साथिया, मिकी घोटियै लाई लै छात्ती तूं अपनी
मत जागै धड़कन कोई मेरे कलेजै
मत प्राण सुरकन फ्ही बेजान जुस्सै
मत जान पेई जाऽ मेरी जान अंदर
ते सुरती फिरी जाऽ ओह् पैह्ले जेही मेरी
में जी उट्ठां सदके तेरी मेह्रबानी
तेरी धड़कनै दी भड़ासा-भड़ासा
सदा लेई, सदा लेई
सदा लेई, सदा लेई
मेरे साथिया, मिकी घोटियै लाई लै छात्ती तूं अपनी ।
मेरे साथिया, मिकी सुरमा बनाई लै
ते पाई लै मिकी अपने उज्जल जेह् नैनें
नैनें जिं’दी डूंह्ग सागर शा डूहंगी
ते लगदी कदें नेईं कुतै थाह् बी जिं’दी
इ'नें डूंह्गे नैनें में डुब्बी जां डूंह्गा
सदा लेई, सदा लेई
सदा लेई, सदा लेई
मेरे साथिया, मिकी सुरमा बनाई लै ।
