मैंह्‌दी

मैंह्‌दी कन्नै भरोच्चे दे कोन च
सकत ऐ,
अपने चटख रंगै नै
बन्न-सबन्नियें लीकरें दे
डिज़ाइन-घाट बनाइयै,
बेरंग हत्थें च
नमीं जान भरने दी
नव-जीवन संचरित करने दी ।
पर नेहा कोई कोन नेईं
जेह्‌ड़ा असल लीकरें पर
करी सकै असर ।
दनां, सोचो
कैसी ऐ उस कलाकार दी कलाकारी
कैसी होग ओह् काह्‌न्नी, ओह् स्याही
जेह्‌दे नै उक्करी दियें,
डींगियें-त्रेह्‌डियें, लम्मियें-छुट्टियें,
फेरमियें, अद्धी-दुब्बियें,
पूरियें-अधूरियें लीकरें गी
भविक्ख बनाइयै
करी दिंदा ओह् म्हेशा लेई बंद
मुट्ठी च ।
—————————-