बूह्टा साढ़े माहिये लाया, बेह्ड़े दा शंगार
पानी देइयै पालां इस्सी, एह् ऐ साढ़ा प्यार
नांऽ मैंह्दी दा सुनेआ जि’नें गांदे होए गतार, मैंह्दी रौंगली
बूह्टा साढ़े माहिये लाया, बेह्ड़े दा शंगार, मैंह्दी रौंगली ।
पौन पुरे दी झुल्लै जेल्लै, झुलदी ऐ अंदर-बाह्र
इसदी खुशबू कन्नै मैह्कन फ्ही जंगल, जाड़-दराड़
जि’यां इसगी पौंगर पौंदी, चढ़दा अत्त गोहाड़, मैंह्दी रौंगली
बूह्टा साढ़े माहिये लाया, बेह्ड़े दा शंगार, मैंह्दी रौंगली ।
पत्तर-पत्तर त्रोड़ी, सांभी रखचै बिच्च पसार
चट्ठु दे बिच्च जंदी ऐ जेल्लै खंदी ओ डाह्डी मार
रंगै कन्नै पत्तर भरी-भरोची करदी खूब शंगार, मैंह्दी रौंगली
बूह्टा साढ़े माहिये लाया, बेह्ड़े दा शंगार, मैंह्दी रौंगली ।
लान स्हेलियां मैंह्दी जेल्लै, इसदा नेईं जवाब
हत्थें दे इच खिड़दी इ’यां, जि’यां खिड़न गुलाब
ओ गोरे हत्थैं फब्बी-फब्बी पौंदी ऐ बेहिसाब, मैंह्दी रौंगली
बूह्टा साढ़े माहिये लाया, बेह्ड़े दा शंगार, मैंह्दी रौंगली ।
कुंडरियै पाया सोह्ना-सोह्ना एह्दा रूप-शंगार
ओ एह्दे रंगें प्यार बसाया, केह् अंदर, केह् बाह्र
एह् मेरा पन्छानु समझी लैंदा भलेआं सार, मैंह्दी रौंगली
बूह्टा साढ़े माहिये लाया, बेह्ड़े दा शंगार, मैंह्दी रौंगली
पानी देइयै पालां इस्सी, एह् ऐ साढ़ा प्यार।
