रंग-बरंगे सुखने भरियै नैनें अंदर
दिंदा रौंह्दा रोज़ मना गी धोखा मौसम
जेह्का मेरे हिस्से अशकै आना गै नेईं
में खबरै की बलगी जा नां ओह्का मौसम।
जि’नें रस्तें पर मौसम सदियें ब’रदे गै नेईं
जीवन पैंडे ओह् रस्ते बी गाह्ने पौंदे
कु’न आखा दा मौसम आपमुहारे उगदे
मौसम अड़ेआ पोटें गुड्डी राह्ने पौंदे
बिन राहे तूं सौखे मौसम तुप्पा करना
राहियै बी केईं बारी उगदा औखा मौसम
जेह्का मेरे हिस्से अशकै आना गै नेईं
में खबरै की बलगी जा नां ओह्का मौसम।
नां बागैं, नां मैह्लैं, नां गै गुरुदुआरैं
नां मस्जिद, नां गिरजाघर, नां मंदर मौसम
नां ग’लियैं नां बस्ती, नां गै चौकैं फुरना
जद् बी फुरना, फुरना तेरे अंदर मौसम
इस मौसम दा सुरमा जेकर अक्खीं पेई जाऽ
फ्ही कुसगी ऐ लगदा बड्डा-लौह् मौसम
जेह्का मेरे हिस्से अशकै आना गै नेईं
में खबरै की बलगी जा नां ओह्का मौसम।
जीवन बागै रौंसें भरेआ बैतल मौसम
भौरें आंह्गर फुल्लें उप्पर फिरदा दिक्खां
मौसम दी जे अक्ख मेरी पन्छानू होई जाऽ
तितली दे फंघें चा मौसम किरदा दिक्खां
सुद्धे मौके मौसम दिंदा मरने गितै
पर जीने लेई दिंदा इक्कै मौका मौसम
जेह्का मेरे हिस्से अशकै आना गै नेईं
में खबरै की बलगी जा नां ओह्का मौसम।
मौसम इक समुंदर नेईं ऐ होना अड़िया
मौसम फुंगें-फुंगें आखो ब’रदे रौह्ना
इस फराटी जेकर में नेईं मौसम होया
फ्ही खबरै में किस फराटी मौसम होना
जे होया बी मौसम में तां मौसम नातै
तुस आखी सकदे ओ होया कोह्का मौसम
जेह्का मेरे हिस्से अशकै आना गै नेईं
में खबरै की बलगीजा नां ओह्का मौसम।
तूं रिश्तें दी पोथी उप्पर कालख पोची
कुस मौसम दे काले प्हाड़े सिखदा रौह्न्नां?
रोज़ "बगान्ना" पच्छी-पच्छी सैल्ले बूह्टे
तूं मौसम दी अस्मत लुटदे दिखदा रौह्न्नां?
मौसम ओह् जो गासै दा बी सीना चीरै
कित्त लाना में तेरा अड़िया फोका मौसम
जेह्का मेरे हिस्से अशकै आना गै नेईं
में खबरै की बलगी जा नां ओह्का मौसम।
