रंग-बरंगे सुखने भरिये,नैनें अंदर
दिंदा रौंह्दा रोज़ मना गी धोखा मौसम
जेह्का मेरे हिस्से अशकै औना गै नेईं
में खबरै की बलगी जा नां ओह्का मौसम।
जिन रस्तें पर मौसम सदियें बरदे गै नेईं
जीवन पैंडे ओ रस्ते बी गाह्ने पौंदे
कुʼन आखा दा मौसम आप-मुहारे उगदे
मौसम अड़ेआ पोटें गुड्डी राह्ने पौंदे।
बिन राहे तू सौखे मौसम तुप्पा करने
बी केंईं बारी उगदा औक्खा मौसम
जेह्का मेरे हिस्से अशकै औना गै नेईं
में खबरै की बलगी जा नां ओह्का मौसम।
नां बागें, नां मैह्लें, नां गै गुरुदुआरें,
नां मस्जिद नां गिरजा घर नां मंदर मौसम
नां गलियें नां बस्ती नां गै चौकें फुरना
जद् बी फुरना, फुरना तेरे अंदर मौसम|
इस मौसम दा सुरमा जेकर अक्खीं पेई जा
फ्ही कुसगी एह् लगदा बड्डा-लौह्का मौसम
जेह्का मेरे हिस्से अशकै औना गै नेईं
में खबरै की बलगी जा नां ओह्का मौसम।
जीवन बागे रौंसें भरेआ बैतल मौसम
भोरें आंह्गर फुल्लें उप्पर फिरदा दिक्खां
मौसम दी जे अक्ख मेरी पंछानूं होई जा
तितली दे फंगें चा मौसम किरदा दिक्खां।
सुद्दे मौके मौसम दिंदा मरने गितै
पर जीने लेई दिंदा इक्कै मौका मौसम
जेह्का मेरे हिस्से अशकै औना गै नेईं
में खबरै की बलगी जा नां ओह्का मौसम।
मौसम इक्क समुन्दर नेईं ऐ होना अड़ेआ
मौसम फुंगें फुंगें आखो बरदे रौह्ना
इस्स फराटी जे कर में नेईं मौसम होआ
फ्ही खबरै में किस्स फराटी मौसम होना।
जे होया बी मौसम में तां मौसम नातै,
तुस आखी सकदे ओ होया कोह्का मौसम
जेह्का मेरे हिस्से अशकै औना गै नेईं
में खबरै की बलगी जा नां ओहका मौसम।
तूं रिश्तें दी पोथी उप्पर कालख पोची,
कुस मौसम दे काले पाड़े सिक्खदा रौह्नै?
रोज़ ʼबगान्नाʼ पछी पछी सैह्ले बूह्टे
तूं मौसम दी अस्मत लुटदे दिक्खदा रौह्नै?
मौसम ओ जो गासै दा बी सीना चीरै
कित्त लाना में तेरा अड़ेआ फोका मौसम
जेह्का मेरे हिस्से अशकै औना गै नेईं
में खबरै की बलगी जा नां ओह्का मौसम।
————————
