रंग बरंगे सूखने भरिये, नैनें अंदर
दिंदा रौंदा रोज मना गी धोखा मौसम
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
जिन रस्तें पर मौसम सदियें बरदे गै नेईं,
जीवन पैंडे ओह् रस्ते बी गाह्ने पौंदे।
कुन आखा दा मौसम आप मुहारे उगदे,
मौसम अड़ेआ पोटें गुड्डी राह्ने पौंदे।
बिन राहे तूं सौखे मौसम तुप्पा करने
राहियै बी केईं बारी उगदा ओखा मौसम।
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
नां बागें, नां मैहलें, नां गै गुरु दुआरें
नां मस्जिद नां गिरजा घर नां मंदर मौसम
नां गलियें नां बस्ती नां गै चौकें फुरना
जद् बी फुरना फुरना तेरे अंदर मौसम।
इस मौसम दा सुरमा जेकर अक्खीं पेई जा
फ्ही कुसगी ऐ लगदा बड्डा-लौहका मौसम
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
जीवन बागे रौंसें भरेआ बैतल मौसम
भौरें आंह्गर फुल्लें उप्पर फिरदा दिक्खां
मौसम दी जे अक्ख मेरी पंछानूं होई जा
तितली दे फंघें चा मौसम किरदा दिक्खां।
सुद्दे मौके मौसम दिंदा मरने गितै
पर जीने लेई दिंदा इक्कै मौका मौसम
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
मौसम इक्क समुन्दर नेईं ऐ होना अडिया
मौसम फुंगें-फुंगें आखो बरदे रौह्ना
इस्स फराटी जे कर में नेईं मौसम होआ,
फ्ही खबरै में किस्स फराटी मौसम होना।
जे होआ बी मौसम में तां मौसम नातै
तुस आखी सकदे ओ होआ कोह्का मौसम
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
तूं रिश्तें दी पोथी उप्पर कालख पोची
कुस मौसम दे काले पाड़े सिक्खदा रौनै?
रोज ‘बगान्ना’ पच्छी-पच्छी सैले बूह्टे
तूं मौसम दी अस्मत लुटदे दिक्खदा रौह्नै?
मौसम ओ जो गासै दा बी सीना चीरे
कित लाना में तेरा अडिया फोका मौसम
जेह्का मेरे हिस्से अश्कै औना गै नेईं
में खबरै कीऽ बलगी जा नां ओह्का मौसम।
—————————————————-
