लाडो रानी बड़ी सेआनी
अज्ज गलांदी चुल्ल बनानी।
तुप्पी खूंबै मंझ खनेही
आहा मित्ती शैल कनेही।
पूरी ध्याड़ी मैह्नत कीती
लेइयै कदालू पुट्टी मित्ती।
मित्ती डल्ला दे बिच्च भरी
पसोइयै लाडो घरै गी चली।
लेइयै दाब्बा मित्ती कुट्टै
कन्नै लाडो सूंकांऽ सुट्टै।
अत्त गराह्ड गलेरी मित्ती
मसां-मसां लाडो म्हीन कीती।
मित्ती जेकर होग एह् म्हीन
अग्गी अग्गैं होना ता जीन।
दाब्बे दी झल्ली लैगी मार
तां समझी लैगी जीवन सार।
बिच लाडो तेलबा रलाया
मलम जि’यां लूनै दा लाया।
होई गेई मित्ती जिसलै त्यार
दौं आंध बनाए बरूही बाह्र।
दिक्खी चुल्ल लाडो भरमोऐ
मित्ती दिक्खी मित्ती पसोऐ।
बाली अग्ग ते कीती लोऽ
औन लगी मित्ती चा कश्बो।
लाडो दी मैह्नत कम्म आई
चुल्ली अग्ग गले नै लाई।
——————————
