शिड़कै पर द्रौड़दी ज़िंदगी
कलच्च ते ऐक्सलेटर दी तुर्त-फुर्त
तेजो-तेज रफ्तार च नसदी-भजदी ऐ ।
इस नस्सो-नस्सी च
इक-दुए नै
नेईं आई खैह्रन
सज्जेआ-खब्बेआ
निजमै दे पालन करी
रफ्तार गी ठमकार देने लेई
लग्गी दी ऐ
चौकें-चरस्तें पर---
लाल बत्ती।
लाल बत्ती दे झमकारे नै
जिसलै रफ्तार गी दनां क रोक लगदी ऐ
तां
थोह्ड़-पित्ते
मत्थै त्रिभड़ियां पाई
समें दी घाट
ते
तौल दा ब्हान्ना करी
जाई चढ़दे न
लोकें लेई चलने आह्ली
ज़ेबरा-पट्टी पर बी
हरजाना बशक्क भरना पेही जाऽ।
पर
उत्थै गै
तक्कै च खड़ोते दे
केइयें दियां बाछां खिड़ी जंदियां न
दौड़ी पौंदे न
पुज्जी जाना चांह्दे न
उस इक मैंटै च
हर इक्क गड्डी कोल
मती थमां मती गड्डियें दे
शीशे ठ्होरी लैना चांह्दे न
बद्धोबद्ध मंगी लैना चांह्दे न।
इस्सै लाल बत्ती पर निर्भर न
केईं ज़िंदगियां
सोहै-स्याल पलदियां न
इस्सै पर
एह् दिक्खी लगदा ऐ--
जीने दे तौर-तरीके बशक्क बक्ख न
पर द्रौड़ दौनें गी इक्को जेनही ऐ।
