लैऽ हर थांऽ लैऽ गी थ्होऐ दी
कु’त्थै निं लैऽ जाई ब'वै दी
स्रिश्टी समूलची राज एह्दा
कण-कण बिच सुनचै साज एह्दा
खाल्ली निं कोई थाह्रा ऐ
हर थांऽ एह्दा विस्तारा ऐ
लैऽ बज्झी साहें दी डोरी च
सुनचै दी भौरें दी लोरी च
हर थांऽ जाई लैऽ बसोऐ दी
लैऽ हर थांऽ लैऽ गी थ्होऐ दी।
चन्न-सूरज चढ़दे-ढलदे न
लैऽ बिच निरंतर चलदे न
धरती बी लैऽ दर्हा करदी
दिन-रात चक्कर ला करदी
कुदरत लैऽ बिच बन्होई दी
छंदें बिच कविता होई दी
हर रंग च लैऽ रंगोऐ दी
लैऽ हर थांऽ लैऽ गी थ्होऐ दी।
लैऽ बज्झे दरेआ जा करदे
कुतै नाड़ू गीत सनाऽ करदे
होंदी एह् उप्पर-ख'ल्ल अदूं
उच्छलै दरेआएं छल्ल जदूं
ब्हाऊ बिच कदें भरोंदी ऐ
बर्खा बिच रिमझिम होंदी ऐ
कु’त्थै निं जाई खड़ोऐ दी
लैऽ हर थांऽ लैऽ गी थ्होऐ दी।
लैऽ कोयल दा आलाप, मड़ो
कुदरत बिच अपने आप, मड़ो.
रिशी मंत्तर जि'यां गाऽ करदे
सुर पक्खरू जाड़ें लाऽ करदे
आई निश्चित समें खड़ोंदी ऐ
बनी मौसम झट बदलोंदी ऐ
हर थांऽ सर्वव्यापक होऐ दी
लैऽ हर थांऽ लैऽ गी थ्होऐ दी।
जीवन दी एह् शुरुआत, मड़ो
माह्नू दी एह् परभात, मड़ो
शुरु जीवन इस नै होंदा ऐ
जमदे जदूं बच्चा रोंदा ऐ
दिलै धड़कन बनियै चलदी ऐ
जदूं साहें दे बिच रलदी ऐ
जीवन बिच जीवन होऐ दी
लैऽ हर थांऽ लैऽ गी थ्होऐ दी।
शब्दें बिच अर्थ बनांदी एह्
गीतें बिच सुर चढ़ांदी एह्
भाशा बिच एह् अनुशासन ऐ
एह्दा गै थांऽ-थांऽ शासन ऐ
वाक्यें बिच शब्द व्यवस्था ऐ
भावार्थें च एह्दा रस्ता ऐ
कविता बिच नित्त बन्होऐ दी
लैऽ हर थांऽ लैऽ गी थ्होऐ दी ।
ढली अर्थैं व्यंग करा करदी
ध्वनियें बिच सुर चढ़ा करदी
जदूं बिच विचारें बंद होऐ
फ्ही लेख जां अदूं निबंध होऐ
जदूं लैऽ बिच पूरी रज्जी जाs
भाशा व्याकरण च बज्झी जाs
लैऽ लफ्जें बिच लखोऐ दी
लैऽ हर थांऽ लैऽ गी थ्होऐ दी।
………………………………….
