मन कुसै दे थाह्र बनाना होंदा नेईं सखल्ला
जानी-बुज्झी बनना पौंदा कदें कुसै 'लै ल्हल्ला ।
अपने सदा सुआतम अंदर आह्ननी पौंदी ल्हीमी
मूंह् खिड़दी मुस्कान लोड़दी, मुंडी, अड़ेओ, नीमीं
सूधें दा बी कायल होंदा अक्सर अति धड़ल्ला
जानी-बुज्झी बनना पौंदा कदें कुसै 'लै ल्हल्ला ।
गल्ल निं जेकर माफक आवै, चलै मनै पर आरी
हां च हां मलानी पौंदी मन मारी केईं बारी
पुच्छनी बी निं कदें कुसै गी धैंथी गल्ला-गल्ला
जानी-बुज्झी बनना पौंदा कदें कुसै 'लै ल्हल्ला ।
दशा मनै दी कुसलै कोह्दी कैसी ऐ कु’न जानै
गल्ल कुसै दी सु’ट्टी पानी कैह्सी, यरो, धङाणै
कु’न जानै मन खुश ऐ जां फ्ही जख्म कलेजै अल्ला
जानी-बुज्झी बनना पौंदा कदें कुसै 'लै ल्हल्ला ।
हर बेल्लै हर माह्नू अग्गें जाइयै बी निं ढौना
हमदर्दी दे भाव लेइयै मिलदे-गिलदे रौह्ना
बड्डा कां बनने शा चंगा, यरो, खुआना ज’ल्ला
जानी-बुज्झी बनना पौंदा कदें कुसै 'लै ल्हल्ला ।
माह्नू गै माह्नू दी रौनक, उ’ऐ ओह्दा स्हारा ऐ
माह्नू नै माह्नू दा रिश्ता की बनाना खारा ऐ
जंगल बी ते नेईं सोभदा, 'केसर', बूह्टा कल्ला
जानी-बुज्झी बनना पौंदा कदें कुसै 'लै ल्हल्ला ।
