मेरे प्यारे कवि दोस्त,
तूं अपनी कलम कन्नै
गरीबें दे जख्में उप्पर मल्हम लांदा रौह्न्ना ऐं
उं’दे आस्तै
तूं खून दे अत्थरू बगांदा रौह्न्ना ऐं ।
बुरा निं मन्नेआं
कदें सोच्चेआ—
जिं’दे दुख च तूं एह् करना ऐं
ओह्ब्बी कदें तेरी कविता पढ़दे न
जां उ’नेंगी पढ़ना औंदा बी है
जां फ्ही काकला उप्पर मल्हम लाई-लाई
उस्सी होर मलैम करदा जा करना ऐं
जां फ्ही
अपने साथी कवियें दी आह् ते वाह् लैने आस्तै
काकलें उप्पर
हमदर्दियें दे दरेआ बगाई-बगाई र्हाणा होआ ना ऐं ?
फैज़, साहिर,ते सक्सेना बनने दे अपने जतन च
तूं कुतै
मीडिया दे उ’नें वीर योद्धाएं आंह्गर ते नेईं बनी गेदा
जेह्ड़े अपनी ब्हादरी कन्नै
अपने स्टुडियो च रोज़
दुशमन दे दंद खट्टे करदे न
