तरकालें दे झुसमुसे च शैह्र अपनी आप-धड़प्फी दी इक अजीब जनेही लैऽ च हा जे पुलसा दी जिप्सी उप्पर लग्गे दे लाउडस्पीकरै ने उस च अपना सुर बी रलाई दित्ता। इक कन्न-फाड़ू, भावहीन अबाज गूंजी—
“सूचना… जनहित च जारी सूचना! मैंटल अस्पताला इक पागल जनानी फरार होई गेई ऐ। रंग कनक बन्ना, कद्द दरम्याना, खिल्लरे दे बाल ते उन्न नीली कमीज-सलोआर लाई दी ऐ। कमीज फट्टी दी ऐ ते सिरै उप्पर दपट्टा बी हैन्नी। ओह् हिंसक ते नेईं ऐ, पर मानसिक तौरा पर डांवाडोल ऐ। उमर कोई 35-40 दे बिच्च-बिच्च ऐ। जेकर तुस उस्सी कुतै दिक्खो तां ठानै खबर करो।”
में घर पुज्जियै चाह् पीने आस्तै अपनी मन-पसंद नुक्करा च दोआरी कोल बैठी ते सेही, पर मेरा मन कल्लै दा मेरे कन्नै नेईं हा। पागल जनानी दे फरार होने दी खबर कल्लै दी ब्हाऊ च उड्डरा दीही। मेरा मन इस्सै घोशना दे व्याकरणै च पलचे दा हा, खास करियै ‘पागल जनानी फरार’ शब्द मेरे दिल-दमाकै च भूं-भूं ते भिन-भिन करी जा दे हे। बथ्हेरी मुंडी झनूनी पर सोआलें दी सुल-बुल बंद नेईं होई।
चाह् ठंडी होई चुकी दी थी। हुन बाह्र न्हेरा बी घनोई पेदा हा। में भूं-भूं ते भिन-भिन शा दूर नस्सने आस्तै टी.वी.लाया, पैह्लें शा लग्गे दे लोकल चैनलै उप्पर बी उ’ऐ सूचना चला दी ही। हुन में इस बारे च मनै च घरमोल पांदे विचारें शा नस्सने दे बजाए हथ्यार सु’ट्टी ओड़े ते फ्ही उत्थै दोआरी कोल जाई बैठी जित्थुआं बाह्र चौकै च झांक पौंदी ही। मेरे बौंह्दे गै मनै च इक सोआलै जि’यां छाल जन मारी ते फ्ही सोआलै चा सोआल पौंगरन लगी पे। सोआल हा–” पागल ते फरार? फरार ते होशा आह्ले होंदे न। जिस्सी दुनिया-समाज ने ‘पागल’ आखियै हर जिम्मेदारी ते होश शा बरी करी ओड़े दा होऐ जां जिन पैह्लें गै दुनिया कोला अपना जैह्नी सरबंध त्रोड़ी लेदा होऐ, ओह् फरार की होग? फरार होने दी केह् ब’जा होई सकदी ऐ? ओह् आखर कु’त्थै जाना चांह्दी होग? पागलपन ते अपने आपै च इक आखरी ठौर ऐ, ओह् एह्दी गोद छोड़ियै कुद्धर गेई होग? इस्सै सोआलै दा अगला हिस्सा हा— जां कुतै फ्ही ओह् पागल है बी जां… ?”
में ख’ल्ल चौकै च परतियै झांकेआ। लोक किश छोह्ले-छोह्ले चला दे हे, अश्कै ‘पागल’ शब्दै दे छौरे शा नस्सा दे होन। पर उस जनानी दा इक दख मेरे दमाकै च बना-मिटा दा हा— खिल्लरे दे बालें आह्ली, फटेहाल जनानी, जिसदे जीवन दी तानी शायद मता चिर पैह्लें गै तूंबा-तूंबा होई गेदी होनी। ते कु’न जानदा ऐ जे ओह् आपूं अज्जै तक्कर कि’यां हंडी-बरती होग। इस स्थिति उप्पर हैंग होए दे मेरे दमाकै दी स्क्रीन उप्पर पिछले पत्तरे कुसै आटोमेशन मूवी साहीं खु’ल्लन लगी पे।
पैह्ला द्रिश्श उब्भरेआ– में ‘चिती’, अपने लाके दे सभनें शा माहिर जुलाहे दी धी। खड्ढियें दी खट-खट, शू-शू… दी अबाज साढ़े घरै च संगीत साहीं गूंजदी ही। मेरे आस्तै, कपड़ा बुनना छड़ा इक कम्म नेईं हा, बल्के अपने सुखनें दा रेजा बुनने जनेहा हा। इक दिन दपैह्री में इक खास खेस बुना दी ही। इस खेसै आस्तै चेची साई आई दी ही। गाह्कै शोख रंगें दी मंग कीती दी ही। बापू होर आए ते बोल्ले, “बच्चा, एह् रंग बड़े गै गूढ़े न। सादगी गै साढ़े खेसें दी पन्छान ऐ।” में उ’नें गी गाह्कै दी मनशा दा चेता कराया। फ्ही ओह् बोल्ले, “तानी गी इन्ना मता नेईं खिच्च, धागा त्रुट्टी जाग।” में जवाब दित्ता हा, “बापू, जिस धागे गी अस त्रुट्टी जाने दे डरै तानी नेईं सकदे, ओह् किन्ना गै हंडग?”
मिगी लग्गा जे जां ते बापू होरें गी मेरा जवाब देना पसंद नेईं आया हा जां जवाब पसंद निं आया की जे ओह् चुप करियै अंदरै गी गे उठी हे। उं’दे लेई एह् छड़ा इक धीआ दा तर्क नेईं हा, बल्के उस ‘तानी’ उप्पर हमला हा जिस्सी उ’नें मरजादा दे नांऽ उप्पर ब’रें शा खिच्चियै ब’न्नी रक्खे दा हा। तानी सच्चें गै शैल तनोई दी ही।जेकरउ’दे उप्पर औंगल बजदी, तां धागे कुसै बजैंतरै साहीं बज्जी उठदे। में सिक्खी गेदी ही जे ढिल्ली तानी उप्पर बुनतर शैल नेईं बनदी। जाह्री तौरा उप्पर ते कुसै ने मिगी किश नेईं आखेआ हा पर घरै दी ब्हाऊ च किश ओपरा ते असैह्ज जन मसूस होआ दा हा। इस मूजब में किश बेचैनी मसूस करा दी ही। मता बेचैन मिगी एह् सोआल करा दा हा जे बापू होर शैल चाल्ली जानदे न जे जेकर कोई चीज मती खिच्चो तां ओह् त्रुट्टी जंदी ऐ ते फ्ही घरै च मरजादाएं दे नांऽ उप्पर इन्नी खिच्च, इन्ना तनाऽ की?
इक राती, जिसलै में तानी ताह्रने दे बाद खड्ढी उप्पर बैठी दी गुनगुनाऽ दी ही जे भ्रा ने आइयै मेरे हत्था टस्सरी ध्रूड़ी लेई। बोल्लेआ, “बड़ा बोलनी ऐं नां तूं? लै, हुन बुन अपना भविक्ख! अगले म्हीनै तेरा ब्याह् ऐ।” उन्न करलाइयै आखेआ हा, “चली जागी तां कुतै खलासी होग।”
कोई होर मौका होंदा तां में रोई-करलाई बापू होरें गी सनाना हा, पर मिगी किश समझा नेईं आया जे हुन कुस्सी सनांऽ ते नां गै में रोई ही। बस्स उ’नें धागें गी दिखदी रेही ही जेह्ड़े भ्राऊ दे टस्सरी ध्रूड़ने कन्नै त्रुट्टी गेदे हे। मिगी लग्गा जि’यां ओह् कुसै खेसै दी नेईं बल्के मेरे जीवन दी तानी ही। ओह्दे बाद मिगी बोलने आस्तै किश सुझदा गै नेईं हा, इक चुप्प लग्गी गेई।
दूआ द्रिश्श बल्लै-बल्लै खु’ल्लन लगा। नाली दे कंढै मोतियें दे फुल्लें दी छाबड़ी ते मालन। उच्छली दी नाली दे गंदे पानी दी सड़ैह्ना मूजब में नक्के गी दब्बू दित्ते दा हा। पर मेरी सस्स होर मालनी कोल रुकी गेइयां ते उ’नें मोतिये दे दो हार लेई ले— इक मेरे जोगा ते इक मेरी दरानी जोगा। में अपनी सस्सु होरें गी आखेआ जे इक गै लैओ, में नेईं लाना, इ’नें गी पसंद नेईं ऐ। ओह् बोल्लियां, “तुगी ते पसंद ऐ नां। किश आखग तां आखी ओड़ेआं जे में लेआंदा हा।” घर आइयै में बी गजरा बनाइयै अपने जूड़े उप्पर लाई लेआ। दिन लंघी गेआ। रातीं जिसलै अपने कमरे च जाइयै में सिरै परा दपट्टा तुआरेआ तां नितिन, मेरे पति ने इक दम करलांदे होई आखेआ, “एह् केह् गजरे लाइयै फिरा नी ऐं? तुगी पता ऐ, एह् गजरे कु’न लांदियां न? बड़ा शौक ऐ तुगी गजरे लाने दा? जा, जित्थै जाना ऐ। जा, कर अपना शौक पूरा।”
में गजरा तुआरियै स्टूलै उप्पर पेदे अपने फोटुए उप्पर रक्खी ओड़ेआ। में बिस्तरे उप्पर लेटी ते गेई ही पर नींदर नेड़ै नेईं ढुकी। अपनी इस हालती लेई में मनोमन अपने आपै गी कोसा दी ही की जे इस सब किसै शा मुक्ति लेई में कदें कोई सुक्खन नेईं सुक्खी; कुसै गुरु-म्हात्मा दे चरण धोइयै चरणामत नेईं पीता। नां कदें, स्याने-बजुर्गें दी गल्ल मन्नियै कोई धूनी धखाई, नां मर्चां। इसदा मतलब हा जे में कदें चाहेआ गै नेईं इ’नें कश्टें शा खलासी होऐ। में सब किश अपनी नियति मन्नियै कबूली लेदा हा। में कदें खुश होने दा सुखना गै नेईं दिक्खेआ तां फ्ही मिगी खुशियां थ्होंदियां बी कि’यां? में पढ़े-सुने दा हा जे किश मनचाहेआ हासल करने आस्तै खु’ल्लियें अक्खियैं सुखने दिक्खने पौंदे न। पर मेरा मन इस गल्ला उप्पर जकीन नेईं करदा हा। मिगी लगदा हा जे जेकर सब किश चाह्ने उप्पर मिलदा ऐ तां फ्ही मिगी इस चाल्ली दा जीवन की थ्होआ? में ते ऐसा कदें बी नेईं सोचेआ, नां चाहेआ। इस लेई, जेकर एह् सब किश बगैर चाहे, बगैर मंगे थ्होआ ऐ तां शैल-शैल, खरा-खरा बी थ्होई जाग, मंगना की ऐ। जो मिलग, ओह् सिर-मत्थै। इस लेई, उस दिनै दी होई-बीती दी जिम्मेदारी बी में अपने उप्पर लेई लैती। मिगी मते बारी एह् ख्याल बी औंदा हा जे कुसै कोला बी किश नेईं मंगने दी मेरी आदत कुतै देने आह्ले गी मेरी अड़ी ते नेईं बझोंदी होग? रात अक्खियें च लंघी गेई।
मिगी पता नेईं हा जे फोटुए उप्पर हार रक्खना मेरा एड्डा बड्डा गुनाह् गिनेआ जाग। दुए दिन मिगी मानसिक रोगें दे डाक्टरै गी दस्सन लेई गे। मेरी दोआई शुरू होई गेई। हुन में मशीना साहीं होई गेदी ही।
फ्ही इक दिन केह् पुआड़ा बनेआ, मिगी अज्जै तक्कर समझ निं आई। बडलै-बडलै मैंटल अस्पतालै दी जिप्सी आई ते मिगी दो महिला कर्मचारियें बाहियें दा फगड़ियै बिच्च बठाली लैता। मुक्ख सड़का पर पुजदे तक्कर मिगी समझ नेईं आई जे केह् मामला ऐ। किश समझ औने उप्पर में करलाना शुरू करी दित्ता; चलदी जिप्सी चा उतरने दी कोशश करन लगी। कर्मचारियें आसेआ रोकने उप्पर उं’दे कन्नै हाथापाई करन लगी। उ’नें गी पक्का होई गेआ जे में पागल आं। में मैंटल अस्पताल पुज्जी गेई। दोआइयें दा असर हा जे केह्, मिगी नेईं पता पर मिगी इ’यां सेही होंदा जे एह् दुनिया मिगी मुरदाड़ समझी इल्लें साहीं मिगी ठुंगे मारा दी ऐ। ओह् ठुंगे मिगी मेरी आंदरें तक्कर मसूस होंदे। में अपना ढिड्ड पकड़ी रखदी। मिगी अपनियें आंदरें दा बड़ा फिकर रौंह्दा। में मनोमन बलगन लगी जे जिस परी ने मरियम गी ओह्दी मौती दी खबर दित्ती ही, ओह् हुनै आई के पलै आई।
उत्थै मेरा लाज करा दे डाक्टर होरें गी किश शक्क होआ तां उ’नें इक दिन कौंसलिंग दे दुरान मिगी सारी असली गल्ल सनाने गी आखेआ। फ्ही ओह् मिगी अपने घर लेई आए। डाक्टर साह्ब ते उंऱदी घरै-आह्ली होरें मिगी पुच्छेआ जे अग्गें हुन केह् करना ऐ, मेरी केह् मनशा ऐ? क्या में अपने हक्क आस्तै कनूनी कारवाई करना चाह्न्नी आं जां समझौता? में परते च आखेआ हा, “हक्क कैह्दे उप्पर? जैदादु उप्पर? नेईं, मिगी किश नेईं चाहिदा। मिगी सकून चाहिदा। जेकर तुस मिगी अपने चोभुए च सिर छपैलने दा थाह्र देई ओड़ो तां में थुआढ़े ते लोकें दे घर कम्म करियै अपना गजारा करी लैङ, पर उस घरै पास्सै हुन में मूंह् नेईं करना।” एह् सब किश में बड़े पक्के सुरै च आखेआ हा। उं’दे आसेआ मिगी एह् पुच्छने उप्पर मिगी लग्गा जिऱयां मेरी होंद दी शनाखत होई होऐ। मिगी बझोआ जे हुन मिगी कुसै होर परी दी निहालप नेईं। सगुआं, में आपूं इक परी आं, दुनिया जिसदी निहालपा च नजरां बछाइयै बैठी दी ऐ।
पर अस्पताल एह् खबर उड्डी जे इक पागल जनानी फरार होई गेई ऐ। कोई पुच्छ-मंग नि होई। पुच्छ-मंग करने आह्ले ने कदें पुच्छ-मंग कीती गै नेईं। डाक्टर साह्ब हुंदी घरै-आह्ली होर अपना ‘सखी सैंटर’ चलांदियां हियां। उऱनें मिगी उत्थै सखलाई विभाग दा कम्म सौंपी दित्ता। फ्ही ‘सखी सैंटर’ गै मेरा जीवन बनी गेआ ते अज्ज में उस्सै दी दुआरी च बैठी नी आं।
* * * * * * * *
राती दी रुट्टी लेई मैस्स चा दो-त्रै बारी सनेहा आई गेआ हा। में फेसबुक खोह्ल्ली, उत्थै बी पागल जनानी दे फरार होने दी खबरा दे अपडेट चला दे हे। इक कोई दो घैंटे पैह्लें दी पोस्ट ही जिस च रिपोर्टर दस्सा दा हा जे उस्सी शैह्रै दे मुक्ख बजारै च दिक्खेआ गेआ ऐ, इस लेई मेद ऐ जे तौले गै उस्सी पकड़ी लैता जाग। इन्ने चिरै च रसैप्शनिट दा फोन आया। उन्न सनाया जे कोई जनानी आई दी ऐ। में जाइयै दिक्खेआ, जनानी दा हुलिया फरार जनानी आह्ला गै हा। में उस्सी पुच्छेआ, “तुआढ़ा नांऽ? उन्न आखेआ, “चिती।” में उस्सी अपनी बाहीं दा स्हारा देइयै बठालेआ। फ्ही सैंटर दे वकील हुंदे कन्नै गल्ल कीती। वकील होरें आखेआ जे में ठानै फोन करी ओड़ां ते ओह् बी आई जंदे न।
ओह् बैंचै उप्पर बैठी रेही। ओह् डरी दी नेईं ही ते नां गै उन्न नस्सने दी कोई कोशश कीती। उस्सी पता हा जे पुलस औने आह्ली ऐ, उन्न मेरे अऱल्ल दिक्खेआ। नजरां मिलने उप्पर में इक बारी नांह् च ते दूई बारी हां च मुंडी ल्हाई। ओह् निश्चिंत होइयै बैठी रेही। फ्ही जिसलै मैस्स च, चिती ने फुल्का लैने आस्तै बल्लै नेहै हत्थ अगड़ा कीता तां में दिक्खेआ जे उ’दे हत्थें दियां लकीरां उ’आं गै उलझी दियां न जि’यां खड्ढी उप्पर फंसे दे बेतरतीब धागे होन। ब’रें पैह्लें बापू होरें आखेआ हा जे तानी गी इन्ना नेईं कस्सना जे ओह् त्रुट्टी जाऽ, पर उ’नें एह् नेईं दस्सेआ हा जे जेकर समाज गै तानी गी बखोखी ओड़ै तां उस्सी ठीक करने दा हुनर कु’त्थुआं सिक्खना? पर, बक्त ने सखाई ओड़ेआ हा। मैस्स दी दोआरी दे बाह्र बजारै च अजें बी आप-धड़प्फी जारी ही, पर मेरे अंदर इक अजीब शांति बल्लै-बल्लै उतरा दी ही। में मनोमन उस चिती गी आखेआ, “तेरी जिंदगी दी तानी, जिस्सी लोकें तूंबा-तूंबा करी ओड़ेआ हा, उस्सी अस हुन रलियै बुनगे।” मिगी मसूस होआ जे चिती हुन कोई लाबारस नांऽ नेईं ऐ, बल्के ओह् मेरी अपनी होंद दी नमीं शनाखत ऐ।
