हादसे हसीन बी होंदे न
ते खुशियां गमगीन बी ।
तनहाइयां खुशगवार बी होंदियां न
ते मेले सोगी बी ।
बछोड़ा रौंगला बी होंदा ऐ
ते मिलन फिक्का, बेरंग बी ।
खास बदनाम बी होंदा ऐ
ते आम गुमनाम बी ।
कल्पना हकीकत शा परें बी होंदी ऐ
ते हकीकत कल्पना शा परें बी ।
पानी खड़ुत्त बी होंदा ऐ
ते अग्ग बगदी बी ऐ ।
तेल तरदा बी ऐ
ते लकड़ी डुबदी बी ।
सोशल मीडिया अपनें शा दूर बी करदा ऐ
ते अपनें कन्नै मलांदा बी ऐ।
जीवन बेजान बी होंदा ऐ
ते मौत अमर बी करी जंदी ऐ ।
सैल्ली-सैल्ली डाह्ल्ली दी पुंबली उप्पर
सैल्ली-सैल्ली डोडी चा
कुसै बक्खरे गै, बेमेल रंगें दे
पीले, सूहे, गलाबी, प्याजी फुल्ल खिड़ियै
शलैपा रचदे न
नेकां विरोधाभास जीवन च रंग भरदे न
इक-दुए गी ललकारदे न
तर्क मंगदे न
जीवन तर्क दी पुज्ज थमां बाह्र ऐ
विरोधाभासी ऐ ।
