जीना झूठ ते मरना सच्च, सब्भै लोक गलांदे
अक्खें आह्ले अ’न्ने होइयै, पापैं आप फसांदे
नासमझे नादान भलोके, जीवन-सार निं समझे
नित्त नमां मर्हक्खा लाइयै लोकें गी भरमांदे।
खुदगरजी, अलगरजी दुनिया मतलब दा संसार
पंडत बिकदा, मुल्ला बिकदा, बिकदा हिरख-प्यार
गेई,गुआची मनुक्खता कु’त्थै, कोई ते पारत पाओ
कचे रस्तै सारे पांदे, कचे कच्च कमांदे
जीना झूठ ते मरना सच्च, सब्भै लोक गलांदे
अक्खें आह्ले अ’न्ने होइयै, पापैं आप फसांदे।
पैसा जार ते पैसा मित्तर,पैसा रिश्तेदारी
सज्जन सक्के बेपन्छानू, फिरदे बिच्च खमारी
एह् कैसी लाचारी, अड़ेआ, कैसी ऐ सरदारी
छल-कपट दी माला फेरन, सौ-सौ रूप बटांदे
जीना झूठ ते मरना सच्च, सब्भै लोक गलांदे
अक्खें आह्ले अ’न्ने होइयै, पापैं आप फसांदे।
ज्ञान-ध्यान गी छिक्कै धरियै, टिक्के लान त्रेह्रे
देआ-धरम गी तज्जी बैठे, करदे तीरथ बत्हेरे
मन मैला, उज्जल बस्तर, नेइयों पार पजोंदा
टल्ल बजाइयै. धूफ धखाइयै रुस्से दे मनांदे
जीना झूठ ते मरना सच्च, सब्भै लोक गलांदे
अक्खें आह्ले अ’न्ने होइयै, पापैं आप फसांदे।
